Алматыда балабақшада балаларды оқтаумен ұрған тәрбиеші өз-өзіне қол жұмсады

ERNUR.KZ. Ақпаратты Алматы полиция департаменті растады, деп жазады Stan.kz.

“Алматы қаласының полиция департаменті 1979 жылы туған Б. есімді азаматшаның өз-өзіне қол жұмсағанын растайды. Оқиғаның мән-жайы анықталуда”, – делінген хабарламада.

Қазіргі таңда Жетісу ауданды полиция басқармасының қызметкерлері ҚР Қылмыстық Кодексінің 105 бабы бойынша сотқа дейінгі тергеу амалдарын жүргізуде. Бұл бап бойынша 3 жылдан 8 жылға дейін бас бостандығынан айыру жазасы қарастырылған.

Алматыда балабақшалардың бірінде қатыгез тәрбиешінің балаларға қол көтерген бейнежазбасы таралған болатын. Видеодан оның балаларды құлағынан тартып, оқтаумен ұрғанын байқауға болады. Тәрбиеші сондай-ақ кішкентай қыздардың шаштарынан жұлқылап, тыныштандырады.

Алматы қалалық полиция департаменті аталған факті ҚР ҚК-нің 140 бабы 2 бөлігі бойынша сотқа дейінгі тергеудің бірыңғай тізіліміне тіркелгенін хабарлаған.

Тәрбиеші ата-аналар отырған чатқа байқамай бейнежазбаны өзі салып жіберген.

"Тәрбиеші балаға "идиот" деп айтып жатқанын видеодан көрдік. Бәрі содан басталған. Содан кейін ата-аналардың бірі баламның ауызы уылды, аузына тұз тыққан деп жазды. Баланы қылқындырып, аузына тұз салғанына дейін камерадан көрініп тұр", - деген ата-ана.