Крематорийді 2022 жылдың мамырында қосу жоспарланған.
ERNUR.KZ. Алматыда крематорийдің құрылысы аяқталды, деп жазады Stan.kz.
"Крематорийдің құрылыс жұмыстары 2021 жылдың желтоқсанында аяқталды. Бүгінгі таңда сыртқы инженерлік желілерді, оның ішінде орнатылған пештерді пайдалану үшін газбен жабдықтау желісін тарту жұмыстары жүргізілуде. Крематорийді 2022 жылдың мамырында қосу жоспарда", – деп хабарлаған қалалық әкімдік.
Келісімшартқа сәйкес, крематорий Алматы қаласы, Алатау ауданы Ақын Сара көшесінің солтүстік бөлігінде, ЖЭО-2 шығысына қарай орналасқан патологоанатомиялық бюро жанынан (сыртқы инженерлік желілерсіз) салынды.
Қазақстанда крематорийдің жұмыс істеу қағидалары, сондай-ақ мәйітті кремацияға қабылдау ережелері әзірленіп жатыр. Айта кетейік, 2020 жылдың жазында крематорий құрылысының жобалық-сметалық құжаттарын жасауға тендер жарияланған болатын.
Тапсырыс беруші – Алматы қаласы Жайлы қалалық орта басқармасы. Құрылыс құны – 1,3 млрд теңге.
