"Бурабай" ұлттық паркіндегі өрт бір тәуліктен кейін ғана сөндірілді

ERNUR.KZ. Бурабай ауданында өрт сөндірушілер бір тәулік бойы орман өртімен арпалысты, деп жазады ҚазАқпарат.

Ведомствоның мәліметінше, маусымның 25-де Щучье қалалық ӨБ кезекшілік бөліміне Бурабай ауданының Сарыбұлақ ауылында түтін шығып жатқандығы туралы ақпарат түскен.

Айтылған жерге Щучье қалалық ӨБ-20 кезекші ауысымы және Бурабай аудандық ӨСБ жедел тобы барды.

«Бурабай» МТҰП 35 кварталдағы орман шаруашылығында өрт шықты. Тілсіз жауды ауыздықтауға Щучье өрт сөндірушілерінен бөлек, «Бурабай» МТҰП және «Қазәуеормандықорғау» мекемесінің күш-құралдары жұмылдырылды. Қазіргі кезде өрттің тұтану себебі мен келген материалдық залал көлемі анықталу үстінде», - дейді Бурабай аудандық ӨСБ бастығы Қанат Бабаев.

Қызыл жалын 2,8 гектар аумақты шарпыған.