Қазақстанда кейбір сот істеріне робот шешім шығарады

0
514

Сондай-ақ, Жоғарғы сот «Атамекен» палатасымен бірлесіп, «Цифрлық талдау» жобасын әзірлеп жатыр.


Қазақстанда кейбір сот істеріне робот шешім шығарады

ERNUR.KZ. Қазақстанда судьяның қарауын талап етпейтін даусыз істер бойынша робот шешім шығарады. «Судьяның смарт көмекшісі» жобасы туралы ҚР Жоғарғы Сотының ресми өкілі Айдос Сәдуақасов айтып берді, деп жазады ҚазАқпарат.

«Біз сот жүйесіне робот бағдарламасын енгізуді бастап кеттік. Осы бағдарлама бойынша судьяның қарауын талап етпейтін даусыз істер іріктеліп алынады. Статистика бойынша, дәл осындай 400 мыңға жуық бар. Әсіресе, шартты түрде мерзімінен босату, санкциялар және ел аумағынан шығып кету істері негізінен судьялардың егжей-тегжейлі қарауын талап етпейді. Мұны автоматтандырылған бағдарлама көмегімен жүзеге асыруға болады. Яғни, робот сот шешімі жобасын дайындайды. Судья тексеріп, тек қолын қояды. Егер техникалық қателер кеткен жағдайда, судьяның қайта қарап шығу мүмкіндігі бар», - деді спикер Орталық коммуникациялар қызметіндегі баспасөз мәслихатында.

Сондай-ақ, Жоғарғы сот «Атамекен» палатасымен бірлесіп, «Цифрлық талдау» жобасын әзірлеп жатыр.

«Азаматтар өз дауларының қалай аяқталатынын осы бағдарлама көмегімен біле алады. Интеллектуалды іздеу жүйесі мен арнайы кілт сөздер арқылы республикадағы ұқсас даулардың қалай қаралғанын, онда қандай шешімдер қабылданғанын біле алады. Осылайша, талап арыздардың сапасы артады және сотқа арызды берген дұрыс па, берген жағдайда қанша пайызға жеңіп шығу ықтималдығы бар – осының бәрін «Цифрлық талдау» қызметі алдын ала айтып береді», - деді А. Сәдуақасов.

Бұған дейін де Айдос Сәдуақасов сот жүйесіндегі бірқатар жаңашылдықтарды баяндаған еді. «Аумақаралық соттылық» жобасында сот ісі бір өңір аясында емес, тұтас республика шеңберінде қарастырылады. Кез келген істі судьяларға төраға емес, IT-жүйе кездейсоқ тәсілмен бөледі.

Сондай-ақ, Қазақстанда судьялардың жеке қасиеті мен кәсіби деңгейі қаралып, 300-ден астам вакансия босаған.