Тағы 44 науқас жасанды демалдыру аппаратына қосылған.
ERNUR.KZ. Павлодар облысында пневмониямен ауырып жатқандар саны көп. Бір ғана маусым айында аталған дерттен өңірде 27 адам көз жұмған деп жазады «Павлодар-онлайн». Қазіргі таңда облыста арнайы комиссия құрылып, марқұмдардың диагнозы мен өлу себебін қайта анықтамақшы, деп жазады azattyq-ruhy.kz.
Павлодарлықтардың пневмониядан қайтыс болып жатқанын облыс әкімінің орынбасары Сұңғат Есімханов мәлімдеген. Оның айтуынша, өткен жылдың маусым айында өңірде өкпе қабынуынан бірде-бір науқас қайтыс болмаған.
Аурудың дендеп кеткенін мойындаған облыс басшылығы ауруханадағы төсек-орынның санын арттырдық деп отыр: бұрын оның саны 840 болса, бүгінде 2379-ға жеткізілген. Олардың 290 орны инфекциялық ауруханаларда болса, 2037-і провизорлық орталықтарда, қалғандары карантиндік төсек-орындар.
Сұңғат Есімхановтың айтуынша, облыста қазір пневмония жұқтырған 44 науқас өкпені жасанды желдету аппаратына қосылған. Шілдеде облысқа дәл осындай 8 аппарат әкелу жоспарланып отыр. Қазір өңірде олардың саны – 49.
Павлодар облысында коронавирустық жағдайдың өршіп тұрғанына қарамастан жергілікті тұрғындар той-жиын өткізуін тоқтатар емес. Күні кеше қызын ұзатпақ болған жергілікті тұрғындар анықталып, хаттама толтырылды.
