Олар осылайша өздерінің мүшкіл халіндерін көрсетпекші болыпты.
Оралда үш айдан бері жалақыға қолы жетпей ашуланған зағип жандар салаға жауапты шенеуніктің көзін байлап тастады, деп хабарлайды ERNUR.KZ Астана арнасына сілтеме жасап.
Олар осылай істеу арқылы өздерінің мүшкіл халіндерін көрсетпекші болған екен. Мүгедектердің жеке көмекшілері болса былтырдан бері тиесілі жалақыларын толықтай алмағанын айтады. Бұл аздай қаңтар айында да жалақысыз қалыпты. Амалы таусылған зағиптар енді қала әкімінен заңды митинг өткізуге рұқсат беруін сұрады.
Ашуға булыққа зағип азаматтар жалақы мәселесін шеше алмаған жауапты шенеуніктерді соттап, жалақыны түгел төлеуді талап етуде. Екі сағатқа созылған кездесуде екі тарап ортақ бітімге ақыры келді.
"Ақпан мен наурыздың ішінде бізге осы қаңтардың қарызы төленетін болды. Сағаттарымызды кішкене көбейтеді. Сосын соны қалай болса да, сотқа жеткізбей төлейтін болды", - жеке көмекші Зәуреш Шатикова.
"Атқарылған жұмыстар актісі болады. Сол акті бойынша олар дәлелдеп шығуы керек ол кісіні жетектеп, өздерінің жасап жатқан қызметтерін дәлелдеуі керек. Содан кейін 8 сағатқа дейін төлеу мәселесі тұр. Ол енді әрбір жеке көмекшімен жеке-жеке шешілуі керек. Ол енді жалпылама емес. Әрқайсысын шақырып жеке жұмыстанатын боламыз", - жұмыспен қамту және әлеуметтік бағдарламалар бөлімінің басшысы Ерлан Галеев.
Биылдан бастап, мүгедектерге қызмет көрсету жүйесі өзгертіледі. Яғни, әлеуметтік портал арқылы зағиптар өзіне ұнаған қызмет көрсетушіні өзі таңдайды. Енді мүгедектер ақпан айында рұқсат етілген митинг өткізбек ниетте. Бірақ жергілікті әкімдіктің бұған қалай қарайтыны белгісіз.
