Алып аққаланы тұрзызуға шетелдіктер жариялаған байқау түрткі болды.
ERNUR.KZ. Петропавлдық белсенділер ТМД елдері арасында жарияланған халықаралық байқауға қатысып, бақ сынамақ, деп хабарлайды Хабар арнасы.
Александр Грасс аққала соғуға отбасымен келді. Ол үшін тіпті қажетті күрек-саймандарды арнайы сатып алған. Осылайша таза ауада қар күреп, уақытын тиімді өткізуде.
- Әлеуметтік желіден көріп қалдым. «Біз де қол ұшын созайық» деп бірден осында жеттік. Балаларым да бір мезгіл телефондарын тастап, табиғат аясында еңбек етіп, бізге көмектесіп жатыр. Ең бастысы бұл денсаулыққа пайдалы ғой, - дейді Петропавл қаласының тұрғыны Александр Грасс.
Алып аққаланы тұрзызуға шетелдіктер жариялаған байқау түрткі болды. Ережеге сәйкес мүсін еш техниканың көмегінсіз жасалуы қажет. Бүгінге дейін тұрғындардың күшімен шеңберлерге 6-7 камаз қар жиналды. Туындының жалпы ұзындығы 20 метрден асады. Ерекшелігі: аққала биігінен емес, жатқызып қаланып жатыр.
- Біз креативті аққала жасайық деп шештік. Интернетті ақтарып бірде-бір жатқызылып жасалған мүсінді көрмедік. Осылайша қаламыздың атын шығаруды көздедік. Бірақ тұрғындардың белсенділігі төмен. Барлық жұмыс аяқталған соң, аққаланы суретші бояп, әсемдейді, - деді ұйымдастырушы Артем Бухонин.
Ерекше туындыны жасап жатқандар бірін-бірі білмейді. Бір қызығы, олар тыныққан сәтте өзара танысып жатты.
Дәстүрлі байқауға Ресей, Украина, және Белорусия елдерінен де командалар қатысып жатыр. Жеңімпаз атанғаны 100 мың рубльмен марапатталады. Егер петропавлдықтардың аққаласы төрешілердің көңілінен шықса, белсенділер ұтып алған қаражатты қайырымдылыққа жұмсамақ.
