​Сағынтаев қағаз жүзінде ғана бәрін қатырып жүрген министрлерге ескерту жасады

0
1 093

Не экономикада өсім жоқ, не халықтың алдында айтатын сөз жоқ.


​Сағынтаев қағаз жүзінде ғана бәрін қатырып жүрген министрлерге ескерту жасады

Бүгін Үкімет отырысында Премьер-министр Бақытжан Сағынтаев бөлінген қаражатты игере алмай жатқан министрлерге ескерту жасады, деп хабарлайды ERNUR.KZ. Вaq.kz сайтына сілтеме жасап.

Үкімет отырысында республикалық бюджеттің 2018 жылдың 5 айындағы қорытындысы бойынша министрлер баяндама жасап жатыр. ҚР Ұлттық экономика министрі Тимур Сүлейменов құрылыс саласының даму жайы жыл бойы бір келкі емес серпінді көрсетіп отырғанын айтқан болатын.

Министрдің айтуынша, құрылыс саласының өсу серпіні бірінші тоқсанда 5,9 пайызға ұлғайғанымен, қаңтар-мамырдың қорытындылары бойынша 0,3 пайызды, яғни нөлдік мәнге қарай жақындаған. Бәсеңдеу Павлодар мұнай-химия зауытын жаңғырту бойынша, магистральді құбырлар мен өнеркәсіптік объектілердің, сондай-ақ «Абу-Даби Плаза» көп функциялық кешеннің құрылысы бойынша жұмыстардың төмендеуімен байланысты болып отыр.

Министрлердің баяндамасын тыңдаған Үкімет басшысы мәселенің қайда жатқанын «түсіндіргендей» болды.

«Негізгі біздің мәселелердің барлығы тек қана құрылыста. 275 млрд теңге 2018 жылға қабылдаған болсақ, қалған міндеттемеміз – 178 млрд теңге. Яғни, алда әлі 100 млрд теңгеге міндеттемелер қабылдау керек. Оның ішіндегісі 5 айдың ішінде 42 млдр теңгенің ғана жұмысын атқарғанбыз. Ал уақыт өтіп бара жатыр. Қазан айынан бастап күн суып, жол салу мәселесі, Жеңіс Махмұдұлы, басқа да құрылыстар мәселесінің бәрінде өте ауыр жағдайға келеді. Сонда қалай мұны игереміз?», - деді Сағынтаев.

Премьер-министр егер шын мәнінде қаржы игерілмесе, алты айдың қорытындысымен ақшаның бәрін кері қайтару керектігін атап өтті.

«Бостан-бос ұстап отырғаннан гөрі басқа біздің министрліктердің тарапынан сұраныстар түсіп жатыр. Тиімді игеруге... Өзінің жолымен шығып ақшаны уақытында тиімді игеру қажет. Жолдарға үлкен тапсырмалар болды, Жеңіс Махмұдұлы. Қауіп бар. Мәдениет және спорт министрлігі визит-орталықтарын соғып бітем дегенше туристік маусым өтіп кетеді. Әлі конкурс өтпеген. ЖСҚ-сы жоқ. Онда немене ақша сұрады? Ауыл шаруашылығы, Қаржы министрлігі де... Қосымша міне, қаржы сұрап отырсыздар. 42 млрд деген дайын тұр міне. Алу керек те – басқа салаға салу керек. Бәрібір одан пайда жоқ», - деді ол.

Сөз соңында Үкімет басшысы министрлерге ескерту жасады.

«Елбасының тапсырмасы бойынша Үкімет қаржыны бөлді. Парламент қолдады. Бюджет қабылданды. Бірақ, қаржы игерілмейді. Қашанғы күтіп отырамыз? Не экономикада өсім жоқ, не халықтың алдында айтатын сөз жоқ. Есеп берілген кезде бәрін де қатырып жатырмыз деп айтамыз. Одан кейін бәрі ұмыт қалады. Айтпады демеңіздер, құрметті әріптестер! Соңғы сөз – жарты айдың қорытындысынан кейін бөлінген алайда игерілмеген қаржы басқа салаға жұмсалатын болады. Ары қарай өздеріңіз білесіздер. Халық пен Елбасының алдында өздеріңіз жауап бересіздер», - деді Бақытжан Сағынтаев.