Сыбайлас жемқорлықтан қайтарылған қаражат мектеп салуға жұмсалады - Президент

ERNUR.KZ. Жемқорлықпен күрес тиімді болу үшін мемлекеттік сатып алу жүйесіне бірқатар өзгеріс енгізілді. Ал жемқорлықпен күрес ешқашан тоқтамайды, жалғаса береді. Бұл туралы Мемлекет басшысы Қасым-Жомарт Тоқаев Халықтық коалиция форумында айтты, деп жазады azattyq-ruhy.kz.

Президент өз сөзінде елдің дамуына кедергі келтіріп отырған сыбайлас жемқорлықпен күрестің алдағы уақытта да жалғасатынын мәлімдеді.

«Еліміздің дамуына кедергі келтіріп отырған кеселдің бірі – сыбайлас жемқорлық. Онымен күресу – баршамызға ортақ міндет. Бұл бағытта соңғы үш жылда біраз шаруа атқарылды. Мысалы, осындай қылмысы үшін сотталғандарды мерзімінен бұрын шартты түрде босатуға тыйым салынды. Бұдан былай олардан қайтарылған қаражат мектеп салуға жұмсалады. Жемқорлықпен күрес тиімді болу үшін мемлекеттік сатып алу жүйесіне бірқатар өзгеріс енгізілді. Сондай-ақ құзырлы орган басшыларының жауапкершілігі артты. Бір сөзбен айтқанда, жемқорлықпен күрес ешқашан тоқтамайды, жалғаса береді. Сонда ғана біз осы індеттен таза қоғам құрамыз. Бұл – менің стратегиялық мақсатым!», - деді Президент.