ТҮРКІСТАН: Атырау Мақтааралға 20 тонна балық жіберді

0
842

Тасқын судан зардап шеккендерге көмектесуге ниеттілер өте көп.


ТҮРКІСТАН: Атырау Мақтааралға 20 тонна балық жіберді

Түркістан облысы, Мақтаарал ауданына Атырау облысынан 12 млн.тг көлеміндегі 20 тонна балық пен гуманитарлық көмек келіп жетті, деп хабарлайды ERNUR.KZ.

Ол Атырау облысының әкімі, «Nur Otan» партиясы Атырау облыстық филиалының төрағасы Махамбет Досмұхамбетовтың қолдауымен жүзеге асырылды.

Атырау қалалық партия филиалына қарасты “Дамбы» бастауыш партия ұйымының "нұротандық" балықшылары жалпы жиналысында Мақтааралдың тұрғындарына балық жіберу жөнінде шешім қабылдаған болатын. Бүгін «Амангелді» өндірістік кооперативіндегі (құрылтайшысы Мұрат Әмірғалиев) атыраулық балықшылардың аманаты Мырзашөл өңіріне жеткізіліп, орталық қоймаға қабылданып алынды.


Сонымен бірге, «Транссервис Ақжол» компаниясы атынан азық-түлік пен киім-кешек жеткізілді. Жүк керуенін бастап келген осы компанияның директоры Өтеген Айнабеков атыраулық азаматтар арасында көмектесуге ниеттілер өте көп болғанын айтты.

«Атыраулықтар Мақтааралдағы апатты ауыр қабылдады. "Көмектесемін" дейтін азаматтар көп. Біз Мақтааралмен біргеміз! Ауылдар қалпына келіп, бұдан былай осы киелі Түркістан өңірінің қуаныштары мол болғай», – деді ол.