"Үлкен кісілердің өзі тақпайды": Орамал тағатын жігіт мәселе көтерді

ERNUR.KZ. Әлеуметтік желіде басына орамал тағып, қыздан бетер боянып, тик-ток түсіріп жүрген жігіт көпшіліктің сынына ұшырады. Оған қарсы пікірлер жазып, балағаттап жатқандар аз емес, деп жазады Skifnews.kz.

«Мен өзім визажиспін. Бұрын тек басқаларға макияж жасайтынмын. Қазір өзіме де жасап жүрмін. Осылайша, желілерге видео жүктеймін. Ал орамалды тағудағы мақсатым – оны үлгі ету. Қазақ әйелдері орамал таққан. Орамал қазақ әйелдерінің символы секілді болған. Бірақ, қазір орамал тағатын қыз-келіншектер аз. Үлкен кісілердің өзі орамал тақпайды. Мен осы мәселені көтеру мақсатында орамал тағып жүрмін. Қазір де орамал тағып шықтым. Ал макияжды өз кәсібімді көрсету мақсатында жасаймын. Мен гей емеспін. Кәдімгі жігітпін», - деді Мұхамед.

Мұхамед өзінің мұсылман екенін айтты. Алайда, бала күнінен косметикаға жақын болып өскен. Тіпті, үнемі түсінде айнадан өзінің боянған бейнесін көп көрген екен. Қазір сол кейіпті өмірде қайталап жүр.

«Отбасымызда 7 ағайындымыз. 5 әпкем, 1 ағам бар. Ата-анам, жақындарым бастапқыда менің бұл тірлігімді түсінбей, ұрысты. Мен бәрін түсіндіріп, бұл жұмыс екенін айттым. Тек жұмыс ретінде қарайтынымды, көзқарасымның дұрыс екенін айттым. Қазір бәрі мені түсінеді. Еш қарсылық көрсетпейді», - дейді ол.

Өзін «макияж жасайтын алтын жігіт» деп таныстырған ол өзіне көп жағымсыз пікір жазылатынын біледі.

«Сені өлтіріп кетемін», «атып кетемін», «қатын сияқтысың», «сен гейсің» дейтіндер көп. Мен ондай пікірлерді оқымаймын да, мән бермеймін де. Себебі, маған елдің не ойлағаны маңызды емес. Мен өзім қалаған нәрсені жасаймын. Визажистік қызмет өзіме ұнайды. Одан ешқашан бас тартпаймын. Керісінше, мені, мен сияқты боянатын жігіттерді қабылдаса екен деймін. Көпшіліктен соны талап етемін», - деді орамалды жігіт.