Бұл туралы бүгін Астана қаласында Үкіметтің отырысында «Қаржы секторын цифрландырудың кейбір мәселелері туралы» сөйлеген сөзінде ҚР Ұлттық банк төрағасы Данияр Ақышев мәлімдеді.
фото: lada.kz
ERNUR.KZ. Алдағы уақытта ұялы телефон номері арқылы барлық төлем түрлері қабылданатын болады, деп хабарлайды ERNUR.KZ Baq.kz ақпарат порталына сілтеме жасап.
Бұл туралы бүгін Астана қаласында Үкіметтің отырысында «Қаржы секторын цифрландырудың кейбір мәселелері туралы» сөйлеген сөзінде ҚР Ұлттық банк төрағасы Данияр Ақышев мәлімдеді.
Бұл шара клиенттерді қашықтықтан сәйкестендіруді қамтамасыз етуге бағытталған деп атап өтті.
«Бүгінгі күні ішкі істер, әділет, ақпарат және коммуникациялар министрліктерімен бірлесіп мемлекеттік дерекқордан биометрикалық көрсеткіштерді және мәліметтерді пайдалана отырып клиенттерді онлайн сәйкестендіру мәселелері пысықталуда. Сол сияқты Қазақстан Ұлттық Банкі жанынан жылдам төлемдерге арналған инфрақұрылымды ұйымдастыру бойынша жүйе платформасы құрылады. Ол банктердің клиенттері арасында жылдам режимде мобильдік телефон нөмірі бойынша төлемдерді жүргізуді қамтамасыз етеді. Қазіргі кезде жүйенің функционалы пысықталу үстінде, пилоттық режимде оны іске қосу ағымдағы жылдың 3-тоқсанының соңына жоспарланып отыр», - деді Данияр Ақышев.
Оның айтуынша, онлайн-сақтандыруды енгізу жобасы халыққа міндетті сақтандыру шарттарын сақтандыру компанияларының интернет - ресурстары арқылы электрондық нысанда жасасуға мүмкіндік береді.
Ол қазіргі кезде Қазақстан Ұлттық Банкінің цифрлық ортада кибершабуылдар мен алаяқтық іс-қимылдарға қарсы тиімді әрекет ету үшін жүйелі шараларды пысықтап жатқанын қоса айтты.
«Сонымен қатар Ұлттық банк жаңа технологиялар мен шешімдерді ендіру, яғни «реттеу ортасын» құру үшін ерекше құқықтық реттеу режимін қолдану мүмкіндігін қарастыруда. Аталған жобаларды ендіру қаржы секторында цифрлық сервистерді дамыту үшін негіз болады», - деп қорытындылады Данияр Ақышев.
