Жеті баланың анасын пышақтап тастаған күдікті жайлы деректер айтылды

0
603

Күдікті үйіне барған соң анасына барып, әйелді өлтіріп тастағанын айтып жылаған.


Жеті баланың анасын пышақтап тастаған күдікті жайлы деректер айтылды

ERNUR.KZ. Атырау облысы Жылыой ауданы Құлсары қаласында жеті баланың анасын 25 жастағы азамат пышақтап тастаған болатын. Мектепте еден жуатын әйел ай сайын 74 мың теңге жәрдемақыға күн көрген, деп жазады Stan.kz.

35 жастағы әйелдің жеті баласы болған. Ең кішісі – алты жастағы ұл бала балабақшаға барса, бес баласы мектеп жасында. 16 жастағы қызы аудандық колледжде оқиды.

25 жастағы жігіт әйелді әкімдік ғимаратының жанында өлтірген. Екеуі ұзақ сөйлесіп, кейін жігіт әйелді аяусыз пышақтап тастап, үйіне кетіп қалған. Үйіне барған соң анасына барып, әйелді өлтіріп тастағанын айтып жылаған.

Күдікті – отбасындағы жалғыз ер бала. Вахталық әдіспен жұмыс істеген. Одан кейін тұрмыс құрған үш әпкесі бар. Қарт анасымен бөлек тұратын жігіт қазір қамауға алынды.

“Отбасы тамыз айына дейін 20 мың теңге атаулы әлеуметтік көмек алды. Сондай-ақ жеті балаға 74 мың теңге ай сайынғы жәрдемақы төленіп отырды. Одан бөлек, әкесін де, анасын да жұмысқа орналастырдық. Алайда екеуі де бір жұмыста ұзақ жұмыс істемей, шығып кете береді. Қазір ер адам жұмыссыз. Қайырымдылық жасаған кезде осы отбасыны қалдырмаймыз. Азық-түлік, тұрмыстық заттар мен қаржылай көмек көрсетіп тұрдық”, - деді Stan.kz тілшісіне аудандық әкімдіктегілер.

Ер адамның әйелді не үшін өлтіргені белгісіз. Алдын ала болжам бойынша, екеуінің арасында кикілжің болып, күдікті өз-өзін ұстай алмай қалған.

Қазір жеті бала әкелерінің қасында. Ал қаза тапқан әйелді демалыс күні жер қойнына тапсырды. Оның атында екі несие бар екені белгілі болды.

Күдікті Атырау қаласындағы тергеу изоляторына жеткізілді. Полиция қызметкері оны бір сағаттың ішінде қолға түсірген. Сотқа дейін абақтыда болады. Тергеу амалдары жаласуда.

Әйелді өлтіретін күні осы ауданда 40 жастағы Тараз тұрғынының денесі табылған болатын. Оны басынан соғып өлтірген.

Еске салсақ, осыған дейін Атырау облысында көпбалалы әйелді аяусыз өлтіріп тастағанын хабарлаған болатынбыз.