Димаш пен Игор Крутойдың шығармашылық байланысы тоқтағаны рас па?

Әлеуметтік желілер мен БАҚ-та Димаш пен Игор Крутойдың шығармашылық қарым-қатынасы үзілгені туралы ақпарат таралған еді. Аталған ақпаратқа қатысты "ДимашАли" шығармашылық орталығының ресми өкілі Назым Жанғазинова пікір білдірді.

"Соңғы уақытта желілерде Димаш Құдайберген мен композитор Игор Крутой арасындағы шығармашылық қарым-қатынастың үзілгені туралы жалған ақпараттар тарап жатыр. Түсіндіріп өтейін.

Бастапқыдан Димаштың Пекиндегі "BG Talent" компаниясымен келісімі бар. Сонымен қатар, Димаш америкалық BMG (Bertelsmann Music Group) Еntertainment компаниясының өкілдерімен, сондай-ақ Швеция, Англия, Корея, Қытай, Франция, Ресей және т. б. елдердің композиторларымен шығармашылық байланыста.

Әртістің барлық продюсерлік қызметін "ДимашАли" шығармашылық орталығы жүзеге асырады.

Композитор Игорь Крутой мен Димаш Құдайберген арасындағы осы күнге дейін жалғасып келе жатқан шығармашылық және достық қарым-қатынас өте жақсы. Игор Крутоймен болатын 2020 жылға жоспарланған барлық концерттер кестеге сәйкес өтеді, - деп "ДимашАли" шығармашылық орталығының ресми өкілі Назым Жанғазинова түсіндіріп өтті.

Сондай-ақ, алдағы уақытта басылымда таралған Димаш жайлы жалған ақпараттарға сенбеуді өтінді.