Өндірістің жобалық құны – 28 млрд теңге.
Шымкент қаласының әкімі Мұрат Әйтенов мұнай-химия бағытындағы «Шымкент Химия Компаниясы» ЖШС өндіріс орнының жұмыс барысымен танысты, деп хабарлайды ERNUR.KZ.
«Оңтүстік» АЭА аумағында метил-трет бутил эфирі және ұнтақты полипропилен өндіру жобасы іске асырылуда. Метил-трет-бутил эфирі – октан отынын ұлғайтуда оттектендіретін қоспа. Ұнтақты полипропилен – қап контейнерлер, құбырлар өндіру үшін қолданылатын шикізат полимер өнімі.
Өндірістің жобалық құны – 28 млрд теңге. Жоба аясында жылына 57 000 тонна МТБЭ, 100 000 тонна ұнтақты полипропилен өндіру жоспарлануда. Зауыттың бір ерекшелігі, мұнай өнімдеріне жоғары стандартты қосымша қоспа өнімдерін дайындайды.
Жалпы аталған өндіріс қаланың өңдеу өнеркәсібіне айтарлықтай үлес қосады. Нақтырақ айтқанда, жылына 4 млрд теңгенің өнімі шығарылмақ.
Құрылыс жұмыстары 2018 жылы басталған болатын. 1-кезең 2021 жылы шілде айында іске қосылды.
Зауыт басшыларының айтуынша, 1 кезеңде 150 адамды, 2 кезеңде 100 адамды жұмыспен қамту көзделуде. 2-ші кезеңді 2023 жылы іске қосу жоспарлануда.
Айта кетсе, Шымкент қаласында аумағы 200 га «Оңтүстік» АЭА-да 22 жоба жүзеге асырылуда. Биыл жаңадан 6 жобаны іске қосу жоспарланған. 301 жаңа жұмыс орны құрылады.
![Қазақстанда](/assets/thumbnails/f2/f2cad61470e5aea8e5b53e70a6199c4b.jpg "Қазақстанда "Наурыз" атты жаңа тұрғын үй бағдарламасы іске қосылады")
