​Қазақстан – Андорра – 4:0

«Д» тобынан орын алған Қазақстан құрама командасы «Астана Арена» стадионында Андорра құрамасымен кездесті. Қос команданың алғашқы матчында 1:1 есебі тіркелген болатын. Ал, Астанада өткен ойынның басынан жерлестеріміз жылдам шабуылдар ұйымдастырып, 21 – минутта есепті ашты.

18 жастағы футболшымыз Еркебұлан Сейдахмет голдар шоуын бастап берді. 39 – минутқа келіп, Станомир Стойловтың шәкірттері қонақтардың қақпасына екінші голды да соқты. Бұл жолы Бауыржан Тұрыспек анық соққысымен көзге түсті – 2:0.

Үзілістен кейін андорралықтар бір голдың қарымтасын қайтаруға тырысты. Бірақ, «Астана Арена» стадионында оларға гол соғу бақыты бұйырмады. Керісінше күтпеген жерден өз қақпаларына гол соғып алды. 61 – минутта Жозеп Гомес автогол иесіне айналды. 74 – минутта матчтағы соңғы голды Роман Мұртазаев соғып, Қазақстан құрама командасына 4:0 есебіндегі жеңісті келтірді. Бірақ, бұл жеңіс құрама командамыздың жоғары лигага жолдама алуына көмек бермеді. Себебі, топта Грузия құрама командасы 4 ойынның барлығында жеңіске жетіп, мерзімінен бұрын С лигасына жолдама алды.