Мақтааралда Ауған соғысының 30 жылдығына орай, мемлекеттік қызметкерлер мен қоғамдық ұйымдар, құқық қорғау органдары қызметкерлері арасында әуе доптан жарыс өтті.
Кеңес әскерлерінің Ауғанстан жерінен шығарылғанына 30 жыл толуына байланысты ардагерлердің ерліктерін дәріптеу және өмірден өткендерін еске алу мақсатында Мақтаарал ауданында спорттың волейбол түрінен жарыс өтті, деп хабарлайды ERNUR.KZ тілшісі.
Құқық қорғау органдары, аудан әкімі аппараты, кенттер мен ауылдық округ әкімдіктері, дербес бөлімдер мен қоғамдық ұйымдар, білім беру мекемелерінің қызметкерлерінен және ардагерлерден құралған 20-дан астам команда жарыста бақ сынасты.
Аудан әкімі Бақыт Асанов, аудан прокуроры Жұмағали Ботабеков, аудандық ішкі істер бөлімінің басшысы Әділбек Сапарбековтар өз командаларының құрамынан табылып, турнирдің барынша қызықты әрі тартысты өтуіне атсалысты.
Жарыстың қорытындысы бойынша Ж.Ботабеков бастаған «Аудандық прокуратура» командасы І орынды алып, үздік атанды. Ал, «Кәсіподақ ұйымы» командасы ІІ орын, «Аудандық сот» командасы ІІІ орынды еншіледі. Сонымен қатар, мектеп директорларынан құралған «Директорлар» командасы үздік төрттіктен көрінді.
дереккөз: Мақтаарал ауданы әкімдігінің баспасөз қызметі
