Созақтағы аудандық шахмат жарысы 16 желтоқсан – Тәуелсіздік мерекесіне арналды.
16 желтоқсан – Қазақстан Респубикасы Тәуелсіздік күніне орай, Түркістан облысы, Созақ ауданындағы Шолаққорған ауылындағы А. Байтұрсынов атындағы жалпы орта мектебінде шахматтан ауданның ауыспалы кубогы үшін жарыс өтті, деп хабарлайды ERNUR.KZ тілшісі.
Елбасы Н.Назарбаевтың алдымызға қойған міндеттерінің бірі – спорт пен салауатты өмір салтын насихаттау. Сонымен қатар, Президентіміздің елімізді бәсекелестікке қабілетті мемлекеттер қатарына қосуды көздейтін «Интеллектуалды ұлт – 2020» атты жобасы бар. Аудандық шахмат жарысы осы мақсаттарды жүзеге асыру аясында ұйымдастырылды.
Созақ аудандық денешынықтыру және спорт бөлімінің ұйымдастыруымен өткен жарысқа ауданның барлық жас ерекшелігіндегі азаматтары қатысты.
Жарыстың ашылу салтанатында Созақ аудандық денешынықтыру және спорт бөлімінің басшысы М. Ниязәліұлы үміткерлерді Қазақстан Республикасының Тәуелсіздік күні мерекесімен құттықтап, адамды жаңа формацияға тәрбиелеуде, ойлау қабілетін дамытып, кез келген мәселеде жылдам әрі нақты шешім қабылдауға шыңдауда шахмат ойынының орны ерекше екенін айтты.
Жеңіске жетуге рухтандырған аудандағы ақылдылар ойыны қызықты, тартысты өтті. Жарыс қорытындысы бойынша 1 орынды А. Мұсабеков, 2 орынды М. Сейсенбаев, 3 орынды С. Абызов иеленді.
Шахмат жарысының жеңімпаздары мен жүлдегерлері арнайы сыйлықпен марапатталды.
