ТҮРКІСТАН: Мәдениет және өнер саласының өкілдеріне құрмет көрсетілді

0
529

«Мәдениет саласының үздігі» төсбелгісі тапсырылды.


ТҮРКІСТАН: Мәдениет және өнер саласының өкілдеріне құрмет көрсетілді

Түркістанда 21 мамыр – Мәдениет және өнер қызметкерлері күні мерекесі аталып өтті, деп хабарлайды ERNUR.KZ.


Бүгін Түркістанда 21 мамыр – Мәдениет және өнер қызметкерлері күні мерекесі аталып өтті. Салтанатты шараға облыс әкімінің орынбасары Бейсен Тәжібаев, облыстық мәслихатының депутаты Бекарыс Шойбеков және облыстық мәдениет және туризм басқармасының басшысы Әзімхан Қойлыбаев қатысып, сала мамандарын құттықтады.


"Бүгін жауапкершілік арқалап келе жатқан жандарға алғыс айтатын айшықты күн. Мемлекет басшысы Қасым-Жомарт Тоқаев Түркістан қаласына айрықша мәртебе беру мәселесін көтерді. Бұл ретте, Түркістанның рухани, мәдени әлеуетін көтеруде, тың идеяларды жүзеге асыруда Сіздерге артылар жүк ауыр. Қоғам Сіздерден шалқар шабыт пен шығармашылық табыс күтеді. Облыс әкімі Дархан Амангелдіұлының мәдениет саласына деген ыстық ықыласы мен қолдауының арқасында өңірде ауқымды мәдени жобалар іске асып келеді. Бүгінде облыста 700-ге жуық мәдениет және өнер мекемесі түрлі шараларды жоғары деңгейде өткізіп жүр. Осы аптада Астана қаласындағы Түркістан облысының мәдениет күндері өтпек. Халықтың көңілінен шығып жүрген Сіздерге зор алғысымды білдіремін", – деді Бейсен Дәулетұлы.


Мерекелік шарада өңір мәдениетінің дамуына еңбегі сіңген бір топ сала мамандарына «Мәдениет саласының үздігі» төсбелгісі тапсырылды. Сондай-ақ бірқатар мәдениет және өнер қызметкерлері ҚР Мәдениет және спорт министрлігінің Құрмет грамотасымен және Алғыс хатымен, Түркістан облысы әкімінің Құрмет грамотасымен және Алғыс хатымен, Түркістан облыстық мәслихатының және «Amanat» партиясының Түркістан облыстық филиалы төрағасының марапатымен, Облыстық салалық мәдениет, спорт және ақпарат қызметкерлерінің кәсіптік одағының және Облыстық мәдениет және туризм басқармасының Алғыс хатымен марапатталды. Шара барысында өнерпаздар ән мен күйден шашу шашып, мерекелік көңіл-күй сыйлады.


Айта кетейік, Түркістан облысының құрылғанына 5 жыл толуына орай жыл басынан бері ауқымды жобалар іске асып, ел игілігі үшін мәдени-рухани шаралар өтіп жатыр. Соның ішінде «Ауыл кітапханаларына 20 мың кітап» акциясы аясында «Бес жылдыққа – бес әдеби сапар» ұйымдастырылып, Тараз және Алматы қалаларында қаламгерлер бас қосты. Келесі руханият көші Астанада жалғасады. Сонымен қатар «Өнерлі өлке» өнер фестивалі аясында әр апта соңында Түркістан қаласында аудан-қалалардың мәдениет күндері өтіп жатыр.