Жылына 5 миллион турист қабылдауды жоспарлап отырмыз - Р.Аюпов.
Түркістан облысы Германия кәсіпкерлерімен жұмыс жасауға дайын, деп хабарлайды ERNUR.KZ.
Түркістан облысы әкімінің орынбасары Рашид Аюпов Германия Федеративтік Республикасының Қазақстан Республикасындағы Төтенше және Өкілетті Елшісі Моника Иверсенмен кездесті.Кездесуде екі жақты ынтымақтастық жайлы сөз болып, агроөнеркәсіп кешені, жаңартылатын энергия көздері және қалдықтарды қайта өңдеу, жоғары технологиялар саласындағы, сондай-ақ, өңірдегі туризм саласын дамыту жайы талқыланды.
«Түркістан қаласын 2050 жылға дейін дамытуды жоспарлаудамыз. Қаланың шағын, тарихи, әрі туристік орталық болатынына сенеміз. Келешекте жылына 5 миллион турист қабылдауды жоспарлап отырмыз. Түркістан облысында Германиямен бірлескен инвестициялық жобалар іске асырылған және келешекте Германияның сыртқы сауда палата өкілдерімен келіссөздер жүргізіп, жоғары технологиялар саласында инвестициялық жобаларды іске қосуды жоспарлаймыз», - деді Рашид Аюпов.
Кездесу соңында, облыс әкімінің орынбасары мәртебелі мейманды Түркістан облысының инвестициялық мүмкіндіктерімен таныстырып, Германия кәсіпкерлерін бірлесе жұмыс жасауға шақырды.
