Түркістан облысында екі көпір пайдалануға берілді

0
725

Құрылыс жұмыстары 2020 жылдың мамыр-қыркүйек айлары аралығында атқарылды.


Түркістан облысында екі көпір пайдалануға берілді

Түркістан облысындағы маңызды көпірлердің құрылысы аяқталды, - деп хабарлайды ERNUR.KZ.

Түркістан облысы аумағындағы облыстық маңызы бар «Шымкент-Көксәйек-Қасқасу-Шымкент» автомобиль жолы бойындағы «Сайрам су» өзеніндегі көпірге биыл күрделі жөндеу жұмыстарын жүргізілді. Түркістан облысының жолаушылар көлігі және автомобиль жолдары басқармасының тапсырысымен аталған жұмыстарды «Корпорация Береке А» ЖШС мердігер мекемесі 2020 жылдың мамыр-қыркүйек айлары аралығында атқарып шыққан.

Жөндеу жұмыстары кезінде, апатты жағдайдағы көпір толығымен демонтаждалды. Сондай-ақ, көпірді көтеріп тұратын ескі тіректердің орнына бұрғылап құю әдісімен тереңдігі 10 метрді құрайтын, диаметрі 1,5 метрлік 12 дана темірбетонды қадалар құйылған. Жобаға сәйкес, ұзындығы 87 метр, ал ені 12 метрлік көпір құрылысы жүрді. Бұдан өзге, көпірдің екі жағынан аяқжол қарастырылып, көпірдің астына габиондар орналастырылды. Қазіргі уақытта көпір толығымен аяқталып пайдалануға берілді.

Сонымен қатар, 2020 жылы Ордабасы ауданындағы облыстық маңызы бар «Өзбекстан Республикасы шекарасы-Шардара-Арыс-Темірлан-М-32» автомобиль жолы бойындағы «Бадам» өзеніндегі көпірге күрделі жөндеу жұмыстары жүргізілді. Жобаға сәйкес, көпірдің ұзындығы - 96,2 метр, ені - 10 метрді құрайды. 2020 жылдың қазан айында көпір құрылысы толығымен аяқталып, пайдалануға берілді.

Айта кетерлігі, жөндеу жұмыстарының сапасы тапсырыс беруші, техникалық қадағалаушы және «Ұлттық жол активтері сапасы орталығы» мекемесінің Түркістан облысы филиалының мамандары тарапынан тұрақты бақылауда болды.