Түркістан облысында заңсыз қарулар тәркіленді

0
1 611

Полиция қызметкерлері заңсыз сақталған атыс қаруларын ерікті түрде өткізген жағдайда әкімшілік, қылмыстық жауапкершілікке тартылмайтынын ескертеді.


Түркістан облысында заңсыз қарулар тәркіленді

фото: ohotagazeta.ru

ERNUR.KZ. Облыс аумағында 5 мыңнан астам қару иелері тексерілді, деп хабарлайды ERNUR.KZ Түркістан облыстық ІІД Мемлекеттік тіл және ақпарат басқармасының баспасөз қызметіне сілтеме жасап.

2018 жылдың 30 шілдесі мен 2 тамыз аралығында Түркістан облысы аумағында «Қару» жедел-профилактикалық іс-шарасы өткізілді.

Аталмыш іс-шараны өткізудің мақсаты – облыс аумағында қаруды, оқ-дәрілерді, жарылғыш заттар мен жару қондырғыларын заңсыз дайындау және заңсыз айналымымен айналысатын тұлғалар мен ұйымдасқан қылмыстық топтарды анықтау, отты атыс қарумен және жарылғыш қопарғыш заттармен жасалатын қылмыстардың алдын-алу, ескерту және оларды ашу болып табылады. Іс-шара барысында заңсыз айналымнан 9 бірлік қару алынып, 13 бірлік заңсыз сақтаудағы қару ерікті тапсырылған.

Сонымен қатар, облыс аумағында 5 мыңнан астам қару иелері тексеріліп, оларда 204 әкімшілік құқықбұзушылық анықталған.

Аталған, «Қару» жедел-профилактикалық іс-шарасын өткізу барысында Сайрам АІІБ тәртіп сақшылары жергілікті жердің тұрғыны өз үйінде заңсыз тегіс мылтық сақтағанын анықтады.

Сонымен қатар, қазіргі таңда аталған жайт бойынша «Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру» бабымен сотқа дейінгі тергеу амалдары жүргізілуде.

Сондай-ақ, полиция қызметкерлері заңсыз сақталған атыс қаруларын ерікті түрде өткізген жағдайда әкімшілік, қылмыстық жауапкершілікке тартылмайтынын ескертеді.