ТҮРКІСТАН: Ясауи кесенесінің айналасына ең құнды ағаштар отырғызылады

0
922

Мұндағы барлық жұмыстар арнайы мамандардың жіті бақылауында болады.


ТҮРКІСТАН: Ясауи кесенесінің айналасына ең құнды ағаштар отырғызылады

Түркістандағы киелі Ясауи кесенесінің айналасына ең құнды ағаштар егіледі, - деп хабарлайды ERNUR.KZ.

Түбі бір түркі жұрты үшін жұмыр жер бетінде қастерлі мекендегі әлемнің сегізінші кереметі атанған Қожа Ахмет Ясауи кесенесі - ортағасырлық сәулет өнерінің шыңы. Тұтас ұлттың бірегей болмысын айқындап берген Түркістан төріндегі теңдесіз тарихи жәдігердің айналасы абаттандырып, жасыл желекке орануда. Облыс басшысы Өмірзақ Шөкеев кесене аумағына ең құнды ағаш түрлерін отырғызуды тапсырды. Мұндағы барлық жұмыстар арнайы мамандардың жіті бақылауында болады.

Еске салсақ, осыдан тура бір жыл бұрын Баку қаласында Түркістан облысының делегациясы ЮНЕСКО-ның дүниежүзілік мұра комитетінің 43-сессиясында маңызды келісімдерге қол жеткізді. Онда Ясауи кесенесі аумағындағы құрылыс объектілерінің дүниежүзілік мұраға әсерін бағалау мәселелері де қаралған болатын. Дәл осы жиында кесененің айналасындағы аумақты абаттандыру бойынша шешім қабылданған.
Сондай-ақ, облыс әкімі драма театрдың құрылыс алаңын да аралап көрді. 4 қабаттан тұратын ғимараттың жалпы көлемі 9700 шаршы метрді құрайды. Барлық талаптарға сай, заманауи үлгіде салынып жатқан мәдени ошақта 510 адамға арналған көрермен залы орналасқан. Ақтөбе облысының Түркістанға тартуы ретінде салынып жатқан драма театрдың құрылысы алдағы күзде аяқталады деп жоспарланып отыр.