Аяз Ата болып киінген ер адам балабақшадағы ертеңгілік кезінде қайтыс болды
ERNUR.KZ. Ресейдің Кемерово қаласындағы балабақшалардың бірінде ертеңгілік кезінде Аяз Ата болып киінген ер адам қайтыс болды. Қарт кісінің жүрек тұсы ауырған. Мекеме қызметкерлері тез арада жедел жәрдем шақырғанымен, әртіс олар келгенше көз жұмды, деп жазады sputniknews.
Кейінірек анықталғандай, ер адам қалада танымал театр актері екен. Валерий Титенконың әріптестерінің айтуынша, әртіс жүрегіне күрделі ота жасатса да, спектакльдерге қатысып, өзін аямастан беріліп жұмыс істеп жүрген.
Айта кетейік қараша айының басында Алматыда осы жайтқа ұқсас қайғылы оқиға болды. Хэллоуин кешінде танымал қазақстандық каскадер Қасым Жұмағожин көз жұмған. Ол үш метр биіктікте "арқанға асылып тұрған" мумияның рөлін сомдаған.
Биыл көктемде Флорида штатының Тампа қаласында Cirque du Soleil қойылымы кезінде акробат биіктен құлап, қаза тапты.
