Рио-де-Жанейродағы әлемге әйгілі Жарылқаушы Христос ескерткіші қазір туристер үшін жабық, соңғы мәлімет бойынша, Бразилияда 621 адам коронавирус жұқтырған.
ERNUR.KZ. Рио-де-Жанейродағы Жарылқаушы Христос мүсінінде Қазақстан туы пайда болды. Осылайша жергілікті билік коронавирус індетімен күресіп жатқан әлем елдеріне қолдау білдірген, деп жазады sputniknews.kz.
Христос мүсіні теңіз деңгейінен 709 метр биіктікте, Тижука ұлттық саябағының аумағында орналасқан.
Әлемдегі ең танымал көрікті жерлердің бірі қазір туристер үшін жабық.
Билік коронавирустың таралуынан зардап шеккен елдермен бірге екенін білдіру үшін түрлі мемлекеттің туын көрсеткен. Солардың ішінде Қазақстан да бар.
Соңғы деректерге сүйенсек, Бразилияда 621 адам коронавирус жұқтырған. Алты адам көз жұмды. Ел билігі құрлықтағы барлық шекарасын жауып, Еуропа мен Азияның бірқатар елдерінің азаматтарына кіруге тыйым салды. Сонымен қатар, Рио-де-Жанейрода танымал Копакабана және Ипанема жағажайлары жабылды.
Қазақстанда коронавирус жұқтырған 49 адам тіркеліп отыр. Олардың ішінде Алматыда – 22, Нұр-Сұлтанда – 25, Қарағандыда – екі.
16 наурыздан бастап республикада төтенше жағдай жарияланды. Ал 19 наурыздан Нұр-Сұлтан мен Алматы қаласы карантинге жабылады.
