Қырғызстан мен Тәжікстан шекарасында атыс болды

0
126

Шекара маңындағы екі ауыл тұрғындарының арасындағы қақтығысқа тутұғыр орнату мәселесі себеп болған.


Қырғызстан мен Тәжікстан шекарасында атыс болды

ERNUR.KZ. Қырғыз-тәжік шекарасында қақтығыс болды, зардап шеккендер бар, деп жазады Sputnik Қырғызстан.

Қырғызстанның мемлекеттік шекара қызметінің мәліметінше, Ворух (Тәжікстан) ауылының тұрғындары елді мекенге кіреберісте тутұғыр орнатқысы келген, ал Ак-Сай (Қырғызстан) халқы бұған қарсы болған. Кикілжің барысында тараптардың бірі қару қолданыпты. Мемлекеттік шекара қызметі хабарлағандай, оқ атқандар қарапайым тұрғындар болуы мүмкін, себебі аңшы мылтығы қолданылған.

Тәжікстанның ұлттық қауіпсіздік мемлекеттік комитеті шекара әскерінің деректері бойынша, бір Тәжікстан азаматы қаза тапқан, үшеуіне оқ тиіп, тағы жетеуі әртүрлі деңгейде жарақат алған. Қырғызстанның мемлекеттік шекара қызметі бұдан бұрын хабарлағандай, Тәжікстанмен шекарадағы атыс салдарынан бес адам зардап шеккен.

Оқиға орнында Тәжікстан мен Қырғызстанның шекара ведомстволарының ресми өкілдері, екі елдің қарулы күштер және құқық қорғау органдарының қызметкерлері жұмыс істеп жатыр.

Қырғыз-тәжік шекарасындағы ахуал күрделі, бірақ бақылауда, деп хабарлады Қырғызстанның мемлекеттік шекара қызметі. Қазір билік өкілдері халыққа түсіндіру жұмыстарын жүргізіп жатыр.

Қырғыз-тәжік шекарасында оқта-текте қос мемлекет тұрғындары арасында қақтығыстар болып тұрады. Қақтығыстың себебі көбінесе - межеленбеген аумақтар.

Президенттер Сооронбай Жээнбеков пен Эмомали Рахмон осы аптада Исфарада кездесіп, мемлекеттік шекараны межелеу мәселесін талқыламақ.


Айтар жаңалығыңыз, бөлісер оқиғаңыз болса, +77752327733 whatsapp нөміріне жіберіңіз

Пікір қалдыруыңыз үшін сайтқа кіруіңіз қажет