Молдова ғалымдары электронды қол протезін жасап шығарды

0
535

Электронды қол әлемдік аналогтарынан әлдеқайда арзан тұрады.


Молдова ғалымдары электронды қол протезін жасап шығарды

ERNUR.KZ. Молдова ғалымдары электронды протез жасап шығарды, деп хабарлайды «Хабар 24».

Ол қолынан айырылып қалған жандарға арналған. Арнайы білезік бұлшықеттің жиырылу жиілігін санап, тиісті мәліметті протезге жеткізеді. Өнертапқыштардың айтуынша, электронды қол әлемдік аналогтарынан әлдеқайда арзан тұрады.

Электрондық қол протезін ойлап тапқан 22 жастағы Владислав. Кишинев студентінің өнертабысы сапа жағынан ғана емес, қолжетімді бағасы жағынан ұтымды болмақ. Алдын ала есептеулер бойынша, протездің құны мың доллардан аспауы тиіс. Бұл әлемдік аналогтармен салыстырғанда, 30 есеге дейін арзан. Владиславтың ойлап тапқан құрылғысының ерекшелігі - білезігінде болып отыр. Онда 8 сенсор орнатылған. Олар бұлшықеттің жиырылу жиілігін есептеп, мәліметті техникаға жеткізіп отырады.

– Мен адамдарға көмектескім келеді, қоғамға пайдам тисе екен деймін. Өйткені қызықты жобалар аз емес. Алайда олардың барлығы бірдей пайдалы, яғни адамға көмектесуге арналған деп айта алмаймын. Болашақта аяқтың протезін жасау ойда бар, - дейді студент Владислав Ковальский.

Роботты техника саласында Молдова жастары біраз жетістікке жеткен. Соның бір себебі, мектеп бағдарламасына роботты техника пәнін қосу болса керек. Білім беру министрлігі мен халықаралық даму бойынша агенттіктің қолдауымен оны елдегі 15 мың жеткіншек оқып шыққан. Сөйтіп бүгінде коммерциялық жағынан табысты жобалардың үлесі Кишинев студенттеріне тиесілі болып отыр.

– Біздің жастар роботты техника бойынша ұлттық құрамаға кіріп, биыл Дубайда өткен халықаралық олимпиадаға қатысты. Олар 3 алтын медальді еншіледі. Қатысушыларымыз – 14-18 жас аралығындағы мектеп оқушылары, - дейді IT саласында кәсіпкерлікті дамыту және білім беру бойынша менеджер Ионелла Титирез.

Роботты техниканы мектеп бағдарламасына қосудан бөлек Молдова билігі тағы маңызды бастаманы қолға алмақ. Атап айтқанда, жасөспірімдердің жергілікті және таяу шетелдегі ірі Ай-Ти компанияларда тәжірибеден өту мәселесін қарастырып жатыр.


Пікір қалдыруыңыз үшін сайтқа кіруіңіз қажет