Зиянды әдеттерден, әсіресе темекі шегу, жастар ішінде пайда болған электронды сигареттер мен кальян шегуден бас тартудың уақыты келді.
иллюстрациялық фото
COVID-19-дан болатын өлім-жітімнің дүниежүзілік статистикасы осы аурудан қайтыс болғандардың арасында артериялық гипертония, жүректің ишемиялық ауруы, қант диабеті секілді ілеспелі аурулары бар егде жастағы адамдардың жиі кездесетінін дәлелдеді. Бұл туралы медицина ғылымдарының докторы, профессор Сәуле Қасенова айтты, деп хабарлайды ERNUR.KZ.
«Егде адамдар вирус инфекциясын ауыр көтереді және осының салдарынан болатын жағымсыз болжам бар. Өкпенің созылмалы обструктивті ауруы, бронх демікпесі, өкпенің интерстициалдық аурулары сияқты тыныс алу жолдарының созылмалы аурулары бар пациенттер бірінші кезекте «тәуекел тобында» болады, себебі олардың тыныс алу жүйесінің вирустық жүктемеге қарсыласу қабілеті өте төмен», - дейді Сәуле Касенова.
Пульмонолог дәрігер денсаулыққа мұқият қарау керек екенін, ол үшін төмендегі кеңестерді назарда ұстау керектігін айтады:
- дүние жүзінде өзінің тиімділігін көрсеткен карантин шараларын орындау қажет;
- дүкенге аптасына 2 рет тек қана қажетті азық-түлікке шығу керек;
- қоқысты мейлінше басқа адамдармен қарым-қатынастың болу мүмкіндігі аз уақытта - таңертең ерте немесе кешкі уақытта шығарған дұрыс;
- теледидарды күніне тек қана қажетті ақпаратты алу үшін 2 сағат қана көрген дұрыс;
- тыныс алу жолдарының эпителиалық жасушаларын қорғайтын А, Е және С дәрумендерін қабылдау қажет;
- гигиена шараларын орындау керек.
Дәрігердің айтуынша, оқшаулану көп уақытты отбасы мүшелерімен бірге өткізуге мүмкіндік береді.
«Стресті өз бетінше жеңіп шыға алмайтын жалғызбасты егде адамдарды, балаларды, жасөспірімдерді қолдаңыздар. Негативті стресс адам иммунитетіне кері әсер беретіндіктен үрейлі көңіл-күйден алшақ болыңыздар. Зиянды әдеттерден, әсіресе темекі шегу, жастар ішінде пайда болған электронды сигареттер мен кальян шегуден бас тартудың уақыты келді. Қауіпті уақыт та бітеді, өмір де өз қалпына келеді, ол үшін өзіңіздің және сізді қоршаған адамдардың денсаулығын сақтау қажет», - дейді ол.
