Коронавирусқа қарсы отандық вакцина өндірген ғалым көптің көкейіндегі сұрақтарға жауап берді.
Иллюстрациялық фото: ашық дереккөзден
20 жылдан астам уақыт бала көтере алмаған онға жуық келіншек вакцина салғызған соң, аяғы ауыр болғанын айтып, ғалымдарға алғысын жаудырыпты. Бірі дәрінің бір дозасын алып, тағы екеуі екпенің қос компонентін қабылдағаннан кейін бала көтергенін растаған, деп хабарлайды ERNUR.KZ «Еуразия» бірінші арнасына сілтеме жасап.
Індетке қарсы препараттың осындай ерекше әсері бар ма, әллде бұл жай ғана сәйкестік пе?
Еліміз індетке қарсы өзінің екпесін өндіріп, оны пайдалануға енгізген әлем бойынша алтыншы мемлекет. Бүгінде аталған препараттың 100 мың дозасы шығарылып, тиісті мекемелерге жеткізілген. Әрине, вакцинаны өндіру қарқыны әлі баяу болғанымен, өндірушілер шілдеге қарай елде екпенің 500 мың данасы шығарылады деп сендірді.
«Өндірілу ол негізі Қазақстанда болады да, оны флакондарға құю мәселесі ғана шешіліп жатыр. Бүгінгі күні екі орын қазақстанда дайындалып жатыр. Сол шілде айына дейін бұлар үлгерсе, Қазақстанда өндіріледі, ал үлгермесе, Түркияға жіберіледі», - деді биологиялық қауіпсіздік проблемалары ғылыми-зерттеу институтының бас директоры Күнсұлу Закарья.
Қазір препарат сынақтың 3-ші фазасынан өтіп жатыр. Егер екпенің ешқандай жанама әсері байқалмаса, ол дүниежүзілік денсаулық сақтау ұйымының ресми тіркеуінен өтеді. Әзірге қазақстандық вакцинаға шағымданған бір-ақ отандасымыз бар екен. Алматылық 77 жастағы қария екпе қабылдаған соң, бірнеше күн бойы аяғын баса алмай қалғанын айтқан еді. Алайда өндірушілер бұны екпенің кері әсері деуге келмейді, дейді.
«Ол адамның қант диабетімен ауырғаны я ауырмағаны, созылмалы аурулары бар ма жоқ па, соны анықтайтын боламыз. Негізі біздің вакцинаның ешбір кері әсері байқалмаған», - деді биологиялық қауіпсіздік проблемалары ғылыми-зерттеу институтының бас директоры Күнсұлу Закарья.
Бүгінде отандық екпеге әлем елдері де қызығушылығын білдіріп жатыр екен. «QazVac» препаратына Пәкістан, Оңтүстік Америка, оның ішінде Уругвай, Бразилия мен Парагвай елдері, көршілеріміз өзбек пен қырғыз ағайындардан ұсыныстар келіп жатыр. Дегенмен...
«Үшінші клиникалық деңгей бітпегенше біздер ол сұрақтарды қарастыра алмаймыз. Толық зерттеулер аяқталуы тиіс», - дейді биологиялық қауіпсіздік проблемалары ғылыми-зерттеу институтының бас директоры Күнсұлу Закарья.
Енді отандық екпе жайлы ең қызық мәліметке келсек. Алматы және Тараз қаласындағы онға жуық келіншек вакцинаны салдырған соң жүкті болған. Бірі 20 жылдан астам уақыт бала көтере алмай жүрген екен.
«Ол мүмкін вакцинадан да болар. Ол басқа да жағдайлардан да болуы мүмкін. Дегенмен факт. Вакцинациядан кейін осындай тіркелгендеріміз бар», - дейді биологиялық қауіпсіздік проблемалары ғылыми-зерттеу институтының бас директоры Күнсұлу Закарья
Алайда, осы дерекке нақты екпенің қатысы бар я жоқтығын әзірге дәлелдеу қиын. Өйткені жүкті келіншектер клиникалық зерттеулерге қатыспайды. Қалай болғанда да, бастысы енді дүниеге дені сау бөпелер келсе болғаны.
