Әйел мен оның екі баласының өлімі бойынша қылмыстық іс қозғалды – Алматы прокуратурасы

0
854

Қылмыстық істі тергеуді қала прокуратурасы ерекше бақылауға алды.


Әйел мен оның екі баласының өлімі бойынша қылмыстық іс қозғалды – Алматы прокуратурасы

ERNUR.KZ. Алматы прокуратурасы «Спутник» тұрғын үй кешеніндегі пәтерлердің бірінен табылған 34 жастағы әйел мен оның 2015 және 2020 жылы туған балаларының мәйітінде зорлық-зомбылық ізі болғанын мәлім етті, деп жазады Azattyq Ruhy.

Ведомство мәліметінше, қазіргі кезде қалалық полиция департаменті кісі өлтіру дерегі бойынша сотқа дейінгі тергеу амалдарын бастап кеткен, оның аясында жедел-іздестіру шараларының толық кешені жүргізіліп жатыр.

«Тиісті сараптамалық зерттеулер тағайындалды, бейнематериалдар зерделеніп, куәгерлерден жауап алынуда. Қылмыстық-процессуалдық кодекстің 201-бабына сәйкес сотқа дейінгі тергеп-тексерудің өзге деректері жарияланбайды. Қылмыстық істі тергеуді қала прокуратурасы ерекше бақылауға алды», - деп хабарлады Алматы қаласы прокуратурасының баспасөз қызметі.

Еске салсақ, 6 тамызда Алматыда Мамыр шағынауданындағы пәтерлердің бірінен 34 жастағы әйел мен оның 2015 және 2020 жылы туған балаларының мәйіті табылған болатын.