Балалардың бірі оқиға орнында қаза болды, екіншісі елордадағы қалалық ауруханаға жеткізілген. Сотқа дейінгі тергеу жүріп жатыр.
ERNUR.KZ. Ақмола облысында екі бала трактордың астына түсті. Салдарынан 8 жасар ұл оқиға орнында көз жұмды, деп жазады sputniknews.kz.
Трагедия 6 қыркүйек күні Қорғалжын ауданының Қорғалжын ауылында болды.
"Балалар ауыл ішімен келе жатқан шөп тиелген трактордың тіркемесіне шығып, құлап, доңғалақтың астына түсті. Салдарынан 8 жасар ұл оқиға орнында жантәсілім етті. Бес жасар қыз Нұр-Сұлтанның қалалық ауруханасына жеткізілді. Қайғылы оқиға кезінде жүргізуші сау болғаны анықталды", - деп мәлімдеді полиция департаментінен.
Бұл факті бойынша Қылмыстық кодекстің 345-бабы 3-тармағы "Көлiк басқаратын адамдардың жол жүрісі немесе көлiкті пайдалану қағидаларын бұзуы" бойынша сотқа дейінгі тергеу басталды.
Бірқатар сараптама тағайындалды.
Полиция ауылдық елді мекендерде тұратын ата-аналардан егін ору науқаны кезінде балаларды қараусыз қалдырмауды сұрайды.
![Қазақстанда](/assets/thumbnails/f2/f2cad61470e5aea8e5b53e70a6199c4b.jpg "Қазақстанда "Наурыз" атты жаңа тұрғын үй бағдарламасы іске қосылады")
