Аудан орталығынан 5 шақырым қашықтықта орналасқан ауыл халқы енді Ойылдың өзіне қоныстанады.
ERNUR.KZ. Ақтөбе облысы Ойыл ауданы Екпетал ауылының тұрғындарына үй аудан орталығынан салынады, деп жазады inform.kz.
Су тасқыны кезінде Ш.Берсиев атындағы ауылдық округке қарасты Қаратал ауылы, Ойыл ауылдық округіне қарасты Екпетал ауылында үйлерге су кірді. Салдарынан Екпетал ауылында үйлер қирап қалды. Аудан орталығынан 5 шақырым қашықтықта орналасқан ауыл халқы енді Ойылдың өзіне қоныстанады.
«Екпетал ауылы ойпаң жерде орналасқан. Су кеткенде ауыл тұрғындары эвакуацияланып, аудан орталығына көшірілді. Екпетал ауылы тұрғындарына үйді енді Ойыл ауылынан салуды жоспарлап отырмыз. Тұрғындармен кездесу өтті. Олар өз келісімін беріп отыр. Тұрғын үй салу үшін 482 - 690 учаскелері аралығындағы аумақта бос орындар бар. Тұрғын үй салуға арналған инфрақұрылым, яғни газ, су толық жүргізілген. Екпетал ауылы тұрғындарына осы учаскелерде тұрғын үй салу жоспарланып отырмыз», - деді Ойыл ауданының әкімі Асқар Қазыбаев.
Ойылдың жаңа тұрғын үй алабында 1500 орынды мектеп, 90 орындық балабақша салуға арналған жер телімі де қарастырылған.
Айта кетейік, Ойыл ауданында 29-наурыз күні төтенше жағдай жарияланды. Мұнда қазір су, жарықсыз қалған үйлерді қалпына келтіру жұмысы жүріп жатыр.
