Дронға Apple iPhone 11 смартфоны мен қуаттағыш бекітілгені белгілі болды.
ERNUR.KZ. Ұлттық ұлан жауынгерлері Атырау облысындағы ерлер колониясы үстінде сәлемдеме салынған дронды атып түсірді, - деп жазады Tengrinews.kz.
ҚАЖД мәліметінше, оқиға УГ-157/9 түзеу мекемесі маңында (66 түзеу колониясы – ескерт.) болған.
"№1 диспетчер орнынан радиостанцияға №2 жергілікті учаске маңында, колледж ғимараты үстінде белгісіз ұшатын нысан байқалғаны туралы хабарлама келіп түсті. Осы факт бойынша дереу түзеу мекемесі қызметкерлері мен Қазақстан Республикасы Ұлттық ұланының жауынгерлерінен құралған кезекші топ жұмылдырылды", - делінген хабарламада.Оқиға орнына жеткенде кезекші топ дронды байқағаны айтылды. Ұшақтың төмендегенін күткен топ оны атып түсірген. Дрон құлағаннан кейін таспаға оралған қапшық табылды.
"Күдікті қапшықты ашу үшін Атырау қалалық ІІБ жедел тобы шақырылды. Осыдан кейін дронға Apple iPhone 11 смартфоны мен қуаттағыш бекітілгені белгілі болды", - деп қосты ведомствоның баспасөз қызметі өкілдері.
