"Бай-бағландар меншіктеп алады": Айтыскер ақын жердің қазақстандықтарға да сатылуына қарсы

0
2 336

Желі қолданушылары айтыскердің сөзін қолдап, сөзінің орынды екенін жазуда.


фото ғаламтордан

Айтыскер ақын Балғынбек Имашев жер қазақстандықтарға да, Қазақстан азаматтығын алған азаматтарға да берілмесін деген ойын айтты, деп хабарлайды ERNUR.KZ.

Бұл туралы Имашев өзінің инстаграм парақшасында жазды.

"Жұма берекелі болсын, жақсыларым. "Жер шетелдіктерге сатылмайтын және жалға берілмейтін болды" деп бөркімізді аспанға атып қуану қандай бейшаралық? Жер деген Мемлекет болудың алғы шарты емес пе? Ұлтсыз Мемлекет құруға болады. Бірақ, жерсіз Мемлекет болмайды!

Жерді сату - Отанды сату! Біз кешелі бері "Президент Отанды сатпайтын болды" деп қуанып жүрміз. Қасым-Жомарт Кемелұлына рақмет! Даулы мәселенің нүктесін қоюға пәрмен берді. Енді парламенті бар, басқа да құзырлы органдар осы мәселені күлбілтелемей, кібіртіктемей шегелеп тастаса жарар еді. Бірақ ең басты мәселе: Жер қазақстандықтарға да сатылмасын!!! Бүгін жемқорлықпен, парақорлықпен болсын, адал кәсіппен болсын (бұл мүмкін бе біздің елде?) дүние жиып үлгерген бай-бағландар, қалаған жерін меншіктеп алып, ертең келетін ұрпақ үй салып, мал бағатын, егін егетін жер түгіл өлігін көметін көр таба алмай, үнділер құсап мәйіттерімізді өртеп жүрмейік.

Екіншіден, қазақ қызына үйленіп, я болмаса, басқа да себептермен Қазақстан азаматтығын алған "келімсектерге" де жер сатылып, жалға берілмесін! Мемлекетті құраушы кім болса, жер де соныкі. Ұлан байтақ жерді қанымен қорғап, ұрпағына мұра қалдырған бабаларымыздың аманатына қиянат жасауға болмайды. Әрине, бұл шешімге қуанбайды емес, қуанамын! Қуана отырып ұяттан қызарамын, ызадан қуарамын. Өз мемлекетіңде отырып өз жеріңе, өз тіліңе, өз дініңе, өз жанұяңа, өз денсаулығыңа қастандық жасалмағанына мәз болып қуану - қандай қасірет?!", - деді айтыскер.

Желі қолданушылары айтыскердің сөзін қолдап, сөзінің орынды екенін жазуда.

Еске салайық, күні кеше президент Қасым-Жомарт Тоқаев жердің шетелдіктерге сатылмайтынын және жалға берілмейтінін қадап айтты.

Пікір қалдыруыңыз үшін сайтқа кіруіңіз қажет