Дәрігер дұрыс қарамаса, кімге арыздану керек: Министр кеңес берді

ERNUR.KZ. Денсаулық сақтау министрі Елжан Біртанов сапасыз медициналық қызметке тап болған азаматтарға кеңес берді, деп жазады sputniknews.kz.

"Бүгінде әрбір қалада, тіпті әрбір аудан орталығында жергілікті департаменттер бар. Ол департаменттер тауарлар мен көрсетілетін қызметтердің сапасы мен қауіпсіздігін бақылау комитетіне қарайды. Бұл – қайта құрылған комитет. Министрліктің ресми сайты арқылы комитетке шығуға болады. Сол жерде жергілікті департаменттердің байланыс телефондары да көрсетілген", - деді Біртанов есеп беру кездесуінде.

Министрдің айтуынша, дәрігерлер өз жұмысын дұрыс атқармаса, медициналық қызмет сапасыз көрсетілсе, сол департаменттерге жазбаша арыз тапсыру қажет.

"Негізі, біз әлеуметтік желілерге шығатын арыз-шағымдарды да оқып отырамыз. Алайда оның бәрін ресми түрде тіркеуге құқығымыз жоқ. Заң бойынша жаңағы комитетке, я болмаса, жергілікті департаменттерге жазбаша түрде арыз беру керек", - деп атап көрсетті Біртанов.