Қызмет 3 тамыздан бастап ақылы болуы керек еді.
ERNUR.KZ. Қазақстандық лоукостер FlyArystan әуе компаниясы халықаралық рейстерге әуежайда ақылы тіркелуді тоқтатты, деп жазады stan.kz.
Қызмет 3 тамыздан бастап ақылы болуы керек еді. Алайда бұл жаңалық әлеуметтік желіде жаппай сынға ұшырап, қазақстандықтардың арасында дау тудырды.
"Жақында олар бортта ақылы дәретхана жасайды", "Олар еуропалық лоукостер әуе компанияларынан үлгі алады, бірақ олардың билеттері басқа әуе компанияларынан әлдеқайда төмен. Ал Fly-дің бағасы өте жоғары. Дұрыс қызмет көрсетпейді. Рейстің кешігуі тұрақты түрде болады", "Рейстер кейінге қалдырылады, тоқтатылады және екі рейс бір рейске біріктіріледі деген сылтаулары бітпейді", - деп пікір қалдырды желі қолданушылары.
Осы сыннан кейін авиакомпания ақылы қызмет көрсетуді тоқтататынын хабарлады.
"Өкінішке орай, халықаралық рейстерде бұл қызметті іске қосу кезінде лоукостер күтпеген кедергілерге тап болды. Туындаған мәселелер шешілгенге дейін қызметтің іске қосылуын уақытша тоқтату туралы шешім қабылданды. Әуе компаниясы әуежайда ақылы тіркелу қызметін сатып алған барлық жолаушыларға қаражатын қайтарады", - деді компания.
Алайда компания бұл модельден толық бас тартуды жоспарламайтынын айтты.
"FlyArystan Қазақстандағы авиация саласын дамытуға бағытталған осы өнімге және оның цифрландыру стратегиясына алдағы уақытта қайта оралуы мүмкін. Бұл қызметті бүкіл әлем бойынша тасымалдаушылар әуежайға тіркелу процестерін оңтайландыру үшін пайдаланады. Соңғы пайдаланушының әуежайға тіркелу ақысын төлеуі жолаушыларға тегін онлайн тіркелу қызметіне ауысуға үлкен мотивация береді. Онлайн өнімді пайдалану тіркелу орындарында кезек күтетін жолаушылар санын азайтады және терминалда рейс алдындағы процедуралардың жылдамдығын арттырады", - делінген авиакомпания хабарламасында.
