Министрдің айтуынша, қазір жоғары оқу орындарында ІТ мамандығы бойынша 51 мыңнан астам студент білім алады.
ERNUR.KZ. Осы жылдың қыркүйегінен бастап ғылыми дәрежесі жоқ ІТ мамандар жоғары оқу орындарында сабақ бере алады. Бұл туралы білім және ғылым министрі Асхат Аймағамбетов мәлімдеді, деп жазады sputniknews.kz.
Қыркүйек айынан бастап бірнеше өзгеріс енгізгелі отырғанын айтқан министр, бұдан былай тек штатта ғана жұмыс істеу керек деген талап жойылғанын, соның нәтижесінде өндірістегі мамандарды тартуға мүмкіндік пайда болғанын атап өтті.
"Биыл ғылыми дәрежеге қатысты талаптар да жұмсартылды. Енді өндірісте жұмыс істеп, тәжірибе жинаған, білікті ІТ саласының мамандары университеттерде сабақ бере алады", - деді Аймағамбетов үкімет отырысында.
Айтуынша, қазір жоғары оқу орындарында ІТ мамандығы бойынша 51 мыңнан астам студент білім алады. Жыл сайын мемлекеттік тапсырыс көлемі ұлғаюда.
Сонымен қатар, биыл жаңа оқу жылынан бастап цифрлық сала үшін мамандар даярлауды жүзеге асыратын жетекші колледждердің базасында 31 жаңа мамандық пен бағдарлама енгізіледі.
