Қар құрсауында қалған 50 адам құтқарылды

0
372

Оның он бесі бала.


Қар құрсауында қалған 50 адам құтқарылды

ERNUR.KZ. Ал қыс басталғалы елімізде 50 адам қар құрсауынан құтқарылды. Оның 15-сі – бала. Тағы 100 шақты адам қауіпсіз жерге көшірілді, деп жазады 24.kz.

Алысқа ұзап, орта жолда қалып қойғандар да бар. Осындай жайттарды ескере отырып, 6 жылыту бекеті іске қосылды. Яғни, көмек көрсету мақсатында.

Биыл ел аумағында 180 рет дауылды ескерту жарияланды. Облыстық және аудандық маңызға ие жолдар 40 мәрте жабылды. 6 рет жол-көлік қозғалысына шектеу қойылды. Құтқару жұмыстары Ақтөбе, Алматы, Жамбыл, Қарағанды және СҚО-да жүргізілді. Қазір 13 мың техника мен 35 мың маман халыққа қызмет көрсетуге сақадай сай тұр.

"Қыс маусымы енді басталып жатқандықтан алдағы уақытта аязды күндер, көктайғақ, тұман сияқты табиғаттың бұзылуы орын алатыны белгілі. Осыған орай қазақстандықтарға алыс жолға шықпас бұрын өздерінің көліктеріне жеткілікті жанармай қорын құйып алуды және де жылы киім киюді, алыс жолға шықпас бұрын өзінің бағытын айқындап, сол бағыт бойынша ауа райымен танысып, жолға барлық қауіпсіздік шарасын сақтап шығуды сұраймыз", - деді ҚР Төтенше жағдайлар министрлігінің ресми өкілі, Талғат Уәли.

Төтенше жағдайлар министрлігі ел аумағындағы жол бойында 40 құтқару бекетін орнатқан. Ондағы кәсіби дәрігерлер мен фельдшерлер жолда қалып қойғандарға, денесін үсік шалғандарға жедел медициналық көмек көрсетеді. Жол қозғалысындағы шектеулер туралы мәлеметті салалық министрліктің немесе Қазгидрометтің ресми сайттарынан білуге болады. Сондай-ақ «Дәрмен» мобильді қосымшасы арқылы да ауа райы болжамымен таныса аласыз.

"Солтүстік-батыс циклоны Қазақстанға қар әкелді. Алайда оның орнын батыстан келетін антициклон басады. Осыған байланысты елдің батысы мен солтүстігінде күн суытады. Әсіресе, түнгі уақытта сынап бағаны -28 градусты көрсетеді деген болжам бар. Ал республиканың оңтүстік облыстарында ауа температурасы сәл жоғарылауы мүмкін. Өйткені Өзбекстан жақтан келетін циклонның әсері болады. Тиісінше жаңбыр жауып, желтоқсанда күн райы жылымық болады", - деді «Қазгидромет» РМК баспасөз хатшысы, Алина Есмағұлова.