Биыл қара металлургия саласында экспорттық әлеуеті 3 млрд доллар болатын жобалар іске қосылады.
ERNUR.KZ. Бұл туралы бүгін Үкімет отырысында ҚР Индустрия және инфрақұрылымдық даму министрі Қайырбек Өскенбаев айтты, деп жазады ҚазАқпарат.
«2022 жылдың негізгі жобаларын атап өтсем. Олар: Атырау облысында пропилен өндіретін зауыт салу; Қарағанды облысында автомобиль шиналарын жасайтын зауыттың құрылысы; Ақмола облысындағы алтын өндіру фабрикасы мен Түркістан облысында мұнай өңдейтін зауыттың құрылысы. Сондай-ақ Шымкент қаласында алюминий банкілерін өндіру бойынша жоба іске қосылады. Сонымен бірге Шығыс Қазақстан облысында - май экстракциялық зауыты; Жамбыл облысында - минералды тыңайтқыштар өндірісін кеңейту жоспарлануда. Алматы қаласында алюминий және биметалл радиаторларының өндірісі іске қосылады», - деді министр.
Оның атап өтуінше, қара металлургия саласындағы алдыңғы қатардағы жобалардың тізіміне 4 жаңа болат құю зауыты, 2 жартылай кокс өндіру зауыты және 5 ферроқорытпа зауытын іске қосу кіреді. Жобаларды іске қосу 1,2 млрд АҚШ доллары көлеміндегі импортты алмастыруға, сонымен бірге 3 млрд АҚШ доллары сомасына экспортқа шығаруға бағытталған.
«Түсті металлургия саласында 2025 жылға дейін 11 негізгі жобаны іске асыру жоспарланып отыр. Алюминийден өнім өндіру бойынша 6 негізгі жобаны жүзеге асыру жоспарлануда. Бұл экспорт көлемін 645 млн АҚШ долларына арттыруға мүмкіндік береді. Мыстан дайын бұйымдар шығаратын 3 зауыттың құрылысы жоспарлануда. Бұл да экспорт көлемін 200 млн АҚШ долларына ұлғайтуға мүмкіндік ашады», - деді ол.
