Демалушылардан қалған қоқысты күн сайын 80 жұмысшы тазалайды.
ERNUR.KZ. Маңғыстауда Сайын Шапағатов ауылы әкімдігі екі айдың ішінде жағалаудан 250 тонна қоқыс жинаған. Олар тұрғындардың демалу мәдениетінің аздығынан Каспий теңізінің жағасы қоқыс полигонына айналғанын айтады, деп жазады inbusiness.kz.
Сайын Шапағатов ауылы әкімдігі Каспий теңізінің 43-шақырымдағы және 68-шақырымдағы "Голубая бухта" демалыс орнынан қоқыс терген.
"Жағалауды апта сайын тазалауға тура келіп отыр. Өйткені демалушылар қоқыс тастап, қоршаған ортаны бүлдіріп кетеді. Тіпті тұрмыстық қалдықтан аяқ алып жүру мүмкін болмай қалады. Сондықтан әкімнен бастап, кіші қызметкерге дейін 10-15 маман тазалық жұмыстарын жүргізуге мәжбүр", - дейді Сайын Шапағатов ауылы әкімінің орынбасары Ғибрат Мұхамбет.
Сайын Шапағатов ауылына жақын орналасқан Ақшұқыр ауылындағы жағалаудан да аптасына 1 тонна қоқыс шығарылады.
Демалушылардан қалған қоқысты коммуналдық қызметтің 80 жұмысшысы күн сайын таңертеңнен кешке дейін тазалайды. Қоқыс жәшіктері күніне екі рет төгіледі екен.
