"WestOilSoftware" ЖШС жұмысшылары ұйымдастырған наразылық акциясында құқық қорғау органдарының арнайы бөлімшелерінің қызметкерлері бой көрсетті.
ERNUR.KZ. Маңғыстау облысының мұнайшылары мен теміржолшылары өз талаптарымен жаппай наразылыққа шықты, деп жазады stan.kz.
"WestOilSoftware" ЖШС жұмысшылары ұйымдастырған наразылық акциясында құқық қорғау органдарының арнайы бөлімшелерінің қызметкерлері бой көрсетті.
"Біз, Маңғыстау облысындағы "WestOil" жұмысшылары бұған дейін заң аясында өз талаптарымызды қойғанбыз. Алайда ол орындалмай қалды. Талаптарымыз орындалмағандықтан, конституциялық құқығымызды пайдалана отырып, төтенше шаралар қолдандық. Атап айтқанда, бүгін 11 желтоқсан күні көшеге шықтық", - деді мұнайшылар.
Мұнайшылардың жаппай наразылығы болған жерде қауіпсіздік күштері өкілдерінің киімін киген адамдар да бар. Маңғыстау облысы бойынша мемлекеттік еңбек инспекциясы WestOilSoftware компаниясы қызметкерлерінің үш талабының екеуі "еңбек арбитражының отырысында ескертілген" еңбек дауына сәйкес келмейді деп отыр.
"Жұмысшылардың бір талабы қанағаттандырылды, сондықтан олардың ереуілге шығуы еңбек заңнамасына сәйкес емес. Бөлім басшысы аталған кәсіпорын қызметкерлерінің талаптары бойынша еңбек заңнамасының нормаларын түсіндірді. Бұл талаптар дауды және мәселелерді шешу мүмкіндігін қарастыру үшін құрылған келісім комиссиясы мен еңбек арбитражының отырысында қаралды. Осылайша, үш талаптың бірі – көліктер мен арнайы техникаларды жаңғырту "ҚазМұнайГаз" және "Мұнай көлік корпорациясы" компанияларының өкілдерімен бірнеше рет талқыланды. 16 қарашада өткен еңбек арбитражының отырысында көпшілік дауыспен "ҚазМұнайГаз" компаниясы ұсынған бағдарлама бойынша көлік техникасын жаңарту талабын қанағаттандыру туралы хаттамалық шешім қабылданды", - деп хабарлады шенеуніктер.
Сонымен бірге олар "Мұнай көлік корпорациясы" компаниясының қызметкерлеріне ауысу және "WestOilSoftware" ЖШС қызметкерлеріне ҚМГ ұлттық компаниясының бірыңғай еңбекақы жүйесін (БЖСЖ) енгізу туралы талаптар қарастырылмағанын атап өтті. Өйткені бұл мәселелер еңбек дауларының нысанасы болып табылмайды және оларды шешу жұмыс беруші WestOilSoftware ЖШС құзыретіне жатпайтынын жеткізді.
"Бұл мәселе бойынша Еңбек министрлігінің егжей-тегжейлі түсіндірме хаты бар. Сонымен қатар "WestOilSoftware" ЖШС қызметкерлерімен, мемлекеттік органдармен және "ҚазМұнайГаз" өкілдерімен бірнеше рет түсіндіру жұмыстары жүргізілді. Қазіргі уақытта ұжымдық дау шешілді. Өйткені бір талап орындалды, ал қалған екеуі заңнамаға сәйкес еңбек дауы болып табылмайды. Осыған байланысты жұмысшылардың ереуілге шығуы да негізсіз", - деді еңбек инспекциясы.
Сондай-ақ лауазымды тұлғалардың айтуынша, Еңбек кодексінің 176-бабының 1-тармағының 2-1 тармақшасына сәйкес, қауіпті өндірістік объектілерде негізгі жабдықтар мен механизмдердің үздіксіз жұмыс істеуі қамтамасыз етілмесе, ауыр және қауіпті зардаптарға байланысты қызмет тоқтатылады.
"Бұл кәсіпорындарда ереуілдерге еңбек заңнамасымен тыйым салынады, себебі олар "ММГ" АҚ қауіпті өндірістік объектілерінің қызметін (үздіксіз циклді кәсіпорын) қолдайтындықтан, оның қызметін тоқтату өндірістік процесс үшін қайтымсыз зардаптарға әкелуі мүмкін. Жұмыс беруші ереуілді заңсыз деп тану үшін сотқа жүгінуге құқылы, сәйкесінше сот заңды бағасын береді. Егер ереуіл заңсыз деп танылса, қатысушыларға қолданыстағы заңнамада көзделген жауапкершілік шаралары қолданылуы мүмкін", - деді мемлекеттік еңбек инспекциясы.
Сонымен қатар Маңғыстау облысындағы теміржолшылар да еңбек жағдайын жақсартып, басшылықтың отставкаға кетуін талап еткені белгілі болды.
Бұған дейін Бейнеудегі "Қазақстан темір жолы" Ұлттық компаниясы" АҚ (ҚТЖ) қызметкерлері басшысын жұмыстан шығаруды талап етіп, оның тарапынан қысым көрсетіліп жатқанын айтқан еді.
