Мониторинг сауаттылықтың үш бағыты бойынша жүргізіледі.
ERNUR.KZ. Қазақстанда мыңдаған оқушының білім сапасы тексеріледі, деп жазады sputnik.kz.
Ресми мәліметке сәйкес, 15 сәуірден бастап қазақстандық мектептерде оқушылардың білім жетістіктерінің мониторингі басталады. Оған 2462 мектеп бойынша 4-ші және 9-сыныптарында оқитын 150 мыңға жуық оқушы қатысады.
"Мониторинг арқылы оқу бағдарламаларының тиімділігін бағалауға, сондай-ақ, оқу процесінің осал тұстарын анықтауға мүмкіндік бар. Соның нәтижесінде білім беру сапасын арттыру үшін әр аймақ пен нақты білім беру ұйымы бойынша кешенді талдау және әдістемелік ұсынымдар әзірленеді", - дейді министрлік мамандары.
Мониторинг сауаттылықтың үш бағыты бойынша жүргізіледі. Олар:
оқу сауаттылығы;
математика;
жаратылыстану;
Оқушылар тестілеуді компьютермен тапсырады. Сондай-ақ білім беру жетістіктерінің әртүрлі мәндік факторларын анықтау сауалнама жүргізіледі. Оған оқушылар, педагогтер, мектеп басшылары мен төртінші сынып оқушыларының ата-аналары қатысады.
Айта кету керек, білім жетістіктерінің мониторингі 26 сәуірге дейін жалғасады.
