Орман отырғызудың ең көп көлемі Түркістан, Қызылорда және Жамбыл облыстарында жүзеге асырылмақ.
ERNUR.KZ. ҚР Экология, геология және табиғи ресурстар министрлігінің кеңейтілген алқа отырысында вице-министр Ерлан Нысанбаев орман шаруашылығы саласындағы 2020 жылғы жұмыс қорытындысын баяндады, деп жазады Azattyq Rýhy.
Оның айтуынша, Қазақстанда 2019 жылмен салыстырғанда орманмен қамтылған алқап 188 мың гектарға ұлғайған.
«Мемлекет басшысының орман қорында 5 жыл ішінде 2 млрд ағаш отырғызу жөніндегі тапсырмасын орындау аясында облыс әкімдіктерімен бірлесіп өңірлер бойынша Ормандарды молықтыру мен орман өсіру жөніндегі кешенді жоспарлар әзірленіп, бекітілді. Орман отырғызудың ең көп көлемі Түркістан, Қызылорда және Жамбыл облыстарында, сондай-ақ Семей мен Ертіс орманы орман резерваттарының аумағында болжанып отыр», - деді вице-министр.
Ол министрліктің орман шаруашылығы және жануарлар дүниесі комитетінің табиғат қорғау мекемелерінің және облыс әкімдіктерінің орман қорғау мекемелерінің күшімен 5 жыл ішінде 843 мың га алаңда 1,7 млрд ағаш отырғызылатынын атап өтті. Көрсетілген шаралар 2030 жылға қарай елдің ормандылығын 5%-ға дейін жеткізуге мүмкіндік береді.
«Мемлекеттік орман қоры аумағында орман өртінің 701 жағдайы тіркелді, олардың ауданы 41,8 мың га құрады, республика бойынша жалпы залал – 2,1 млрд теңге», - деп мәлімдеді Ерлан Нысанбаев.
Орман өрттерінің ең көп аудандары Жамбыл, Шығыс Қазақстан, Батыс Қазақстан, Павлодар және Түркістан облыстарында, сондай-ақ «Семей орманы» резерватының аумағында тіркелген.
Вице-министр өткен жылы заңсыз ағаш кесу саны 25%-ға төмендегенін, алайда заңсыз кесілген ағаш көлемінің өсуі тіркелгенін хабарлады.
«Ағаштарды заңсыз кесу, жою және бүлдіру жауапкершілігін арттыру мақсатында қолданыстағы заңнамаға айыппұлдарды ұлғайту және бұзушыларға санкцияларды қатаңдату бөлігінде өзгерістер мен толықтырулар енгізілді», - деп толықтырды министрдің орынбасары.
2020 жылдың қорытындыларының қатарында «өсімдіктер әлемі туралы» заң жобасын әзірлеу де бар.
