​Қазақстанда жастарға арналған әлеуметтік желі пайда болады (видео)

0
1 260


​Қазақстанда жастарға арналған әлеуметтік желі пайда болады (видео)

фото: сюжеттің скриншоты

ERNUR.KZ. Интернет-платформаның жобасы кешегі форумда Нұрсұлтан Назарбаевқа таныстырылған, деп жазады «Хабар 24».

Авторлары – мектеп оқушылары Алиля мен Амина Нарықбаевалар. Сонымен өзіміздің әлеуметтік желімізді қашан қолдана бастаймыз және ол қандай болады? Қазақстандық желіні 12 және 14 жастағы Амина мен Алиля ойлап тапты. Сәті түсіп, жасөспірім қыздар әлеуметтік платформаны күні кеше ғана Елбасына таныстырды. Нұрсұлтан Назарбаев жастардың өнертабысына оң бағасын берді.


Амина Нарықбаева, Next Generation жобасының авторы:

— Бәрі тамаша өтті. Елбасы бізді мақтап-мадақтап, мұндай платформаның бүгінгі жастарға берер пайдасы мол екенін айтты. Сонымен бірге Қазақстан Президенті біздің алдымызда әлі талай мүмкіндіктер ашылатынын тілге тиек етіп, сол мүмкіндіктерді қалт жіберіп алмау қажет деп ақыл-кеңес берді. Және біз ойлап тапқан әлеуметтік желіні әрі қарай дамыту керектігін сөз етті.

Generation Next деп аталатын портал – бұл әлеуметтік желінің жаңартылған түрі. Дәлірек айтқанда, сайт өзіне бірнеше интернет-ресурстарды біріктірген. Мұнда ғаламтор пайдаланушылары бір-бірімен танысып, әңгімелесіп қана қоймай, сонымен бірге сан түрлі тақырыпта жаңалықтар оқып, психологтың ақыл-кеңесіне жүгіне алады.

Гүлнәр Арыстанова, Next Generation жобасының жетекшісі:

— Біз бұл жобаны екі ай бойы әзірледік. Алдағы екі апта ішінде оны тестілеуден өткіземіз. Тек содан кейін ғана порталдың сілтемесімен бөлісуді жоспарлап отырмыз.

Жасөспірімдердің жобасы ата-аналар тарапынан қолдау тапқан. Next Generation идеясы Алиля мен Аминанікі болса, қаржылық көмекті әке-шешесі көрсеткен екен.

Алиля Нарықбаева, Next Generation жобасының авторы:

— Мынау біздің команда. Біз қызықты тұлғалардан сұхбат алып, өзіміздің контентімізді құрамыз. Мысалы, актерлермен, вайнерлермен, сондай-ақ ғалымдармен кездесіп, олармен тілдестік. Жалпы біздің сайтқа тіркелген қолданушы тек шынайы әрі пайдалы ақпаратпен бөлісуге келісімін береді.

Бұл екі қыздың бастамасы Елбасының көңілінен шықты. Жобаның сәтті іске асуы үшін Президент Үкіметке осы істі ерекше бақылауға алуды тапсырды.