Парламент депутаттары каникулға кетті

0
319

Депутаттар биылғы 1 қыркүйекке дейін парламенттік каникул деп жарияланатыны туралы арнайы қаулы қабылдады.


Парламент депутаттары каникулға кетті

ERNUR.KZ. Бүгін Парламент палаталарының бірлескен отырысы өтіп, онда алтыншы сайланған Парламенттің бесінші сессиясы ресми түрде жабылды, деп жазады ҚазАқпарат.

Соған орай, депутаттар биылғы 1 қыркүйекке дейін парламенттік каникул деп жарияланатыны туралы арнайы қаулы қабылдады.

Алтыншы сайланған Қазақстан Республикасы Парламентінің бесінші сессиясы заң шығару жұмысының көлемі бойынша да, сондай-ақ міндеттерді шешу тұрғысында да өте ауқымды болды.

Атап айтқанда, өткен сессия барысында палаталардың бірлескен 3 отырысы өтті. Мәжілістің 41 жалпы отырысында 296 мәселе қаралса, Сенаттың 25 жалпы отырысында 165 мәселе қозғалды.

Бесінші сессия кезінде қос палатаның қарауында 161 заң жобасы болды, оның 98-і қабылданды.

Парламент қабылдаған заңдардың 86-сына Мемлекет басшысы қол қойып, олар заңды күшіне енді.

«Осы сессияда депутаттар өздері бастамашы болып, 35 заң жобасын әзірледі, олардың 12-сі қазірдің өзінде қабылданып, 23-і бойынша жұмыс жүргізіліп жатыр. Депутаттық бастама жасаудың мұндай жоғары көрсеткішіне бірінші рет қол жеткізіліп отыр. Парламент депутаттары бесінші сессия барысында өздері әзірлеген заң жобаларының саны алдыңғы төрт сессия ішіндегі көрсеткіштен екі есе дерлік көп», - делінген Парламент Мәжілісі баспасөз қызметінің мәліметінде.

Өткен сессияда Парламентте 13 Үкімет сағаты, 5 парламенттік тыңдау, 20 дөңгелек үстел отырысы, комитеттердің 27 көшпелі отырысы және 2 конференция өтті.

Парламенттік тыңдаулар агроөнеркәсіптік кешенді дамыту, Қазақстанның су қауіпсіздігі, заң шығару процесін одан әрі жетілдіру сияқты мәселелерге арналды.

Сессия жұмысы кезеңінде Парламенттің қос Палатасының депутаттары 308 депутаттық сауал (оның 204-ін – Мәжіліс депутаттары, 104-ін – Сенат депутаттары) жолдады.

Осы сессия барысында Парламент депутаттарына азаматтардан шамамен 9733 хат келіп түсті, олар қолданыстағы заңнамаға сәйкес қаралды.

Пікір қалдыруыңыз үшін сайтқа кіруіңіз қажет