Талдықорғанда арнайы жасақ жауынгерлері отқа оранған үйдің тұрғындарын құтқарды

0
340

Құтқарылғандардың арасында 92 жастағы кейуана да бар.


Талдықорғанда арнайы жасақ жауынгерлері отқа оранған үйдің тұрғындарын құтқарды

ERNUR.KZ. Талдықорғанда жедел әрекет ету арнайы жасағының жауынгерлері отқа оранған бес қабатты тұрғын үйден тұрғындарды эвакуациялады, деп жазады sputnik.kz.

Құтқарылғандардың арасында 92 жастағы кейуана да бар.

7 қыркүйек күні арнайы жасақтың үш жауынгері Нұрсұлтан Оразалиев, Ермек Асатпаев және Медет Садықов "Восточный" шағын ауданында көпқабатты үйден қою түтін шығып жатқанын байқаған. Жігіттер алдымен өртті өздері сөндірмек болған, алайда одан еш нәтиже шықпады.
Сол кезде арнайы жасақ тұрғындарды эвакуациялап, өрт сөндірушілерді шақырды. Бірақ екінші қабаттағы пәтерде төсекке таңылған қарт әйел барын естіп, жалын шарпыған кіреберіске қайта кіріп, әжейді көтеріп алып шықты.
Аман қалған қарт әйел 10 баланың анасы болып шықты, "Еңбек ері", "Күміс алқа", "Алтын алқа" медальдарымен марапатталған. Кейуана өзінің құтқарушыларына алғыс айтты.
Қарияның қызы да арнайы жасақ жауынгерлеріне ризашылығын білдірді. Ол облыстық полиция департаментінің басшылығынан қиын сәтте көмек көрсеткен қызметкерлерді ынталандыруды сұрады.
Анықталғандай, өрт үшінші қабаттағы пәтердің балконынан шыққан, кейін ас үйге тараған. Тұрғын үйдің кіреберісі қас-қағым сәтте көк түтінге оранды.