Өткен жылы 39 мыңға жуық орынға арналған 458 балабақша іске қосылды. Жекеменшік балабақшалардың 93%-на мемлекеттік тапсырыс берілді.
ERNUR.KZ. Бүгін ҚР Оқу-ағарту министрлігінің алқа отырысында министр Ғани Бейсембаев балабақша тәрбиешілерінің балаларға қол жұмсауы жайында сөз қозғады, деп жазады ҚазАқпарат.
«Өткен жылы 39 мыңға жуық орынға арналған 458 балабақша іске қосылды. Жекеменшік балабақшалардың 93%-на мемлекеттік тапсырыс берілді. Нәтижесінде 2-6 жасар балаларды тәрбие-біліммен қамту 89,4%, ал 3-6 жастағыларды - 99,4% артты. Былтыр балалардың дағдыларын, зерттеу қызметін дамыту және дамытушы орта құру үшін оқу және ойын материалдарының тізбесі бекітілді. Яғни, мектепке дейінгі білім беру ұйымдарын жарақтандыру нормалары жасалды», - деді Ғани Бейсембаев ведомствоның кеңейтілген алқа отырысында.
«Өкінішке қарай, былтыр тәрбиешілер тарапынан балаларға күш көрсету фактілері болды. Алдағы уақытта ондайды болдырмау үшін жергілікті атқарушы органдар бақылауды күшейтуі қажет», - дейді министр.
Бұған дейін хабарлағанымыздай, өткен жылы мектеп-балабақшалардың 77 пайызы алғашқы мемлекеттік аттестациядан сүрінген.
