TikTok желісінде құмар ойын ұйымдастырған алматылық тұрғындар сотталды

0
507

Олардың төрт айда 13 млн теңге кіріс алғаны дәлелденді.


TikTok желісінде құмар ойын ұйымдастырған алматылық тұрғындар сотталды

ERNUR.KZ. Қаржы мониторингі агенттігінің Алматы қалалық департаменті әлеуметтік желіде заңсыз ойын бизнесін ұйымдастырушылардың әрекетін тоқтатты, деп жазады azattyq-ruhy.kz.

Ведомство мәліметінше, Алматы тұрғындары TikTok әлеуметтік желісінде ақша алу және ұтыстарды банк аударымдары арқылы беру арқылы онлайн құмар ойындарын ұйымдастырған.

«Тергеу барысында азаматтардың әлеуметтік желілерде 4 ай ішінде заңсыз ойын бизнесін ұйымдастырып, 13 миллион теңгеге жуық сомаға аса ірі көлемде кіріс алғаны дәлелденді. Алматы қаласының екі тұрғыны кінәлі деп танылып, 1,5 жылға бас бостандығынан айырылды», - делінген ҚМА хабарламасында.

Сонымен қатар сот заңсыз ойын бизнесі саласында аса ірі көлемде кіріс алу арқылы осыған ұқсас құқықбұзушылық жасаған 4 тұлғаға қатысты істі қарап жатыр.

«Құрметті азаматтар! Әлеуметтік желілерде құмар ойындар ұйымдастыру заңсыз және ҚР «Ойын бизнесі туралы» заңының нормаларына қайшы келетінін естеріңізге саламыз», - деді ҚМА өкілдері.