Адам өліміне себеп болған шұңқыр кәріз сору станциясын салу үшін қазылған.
фото: кадрдан
Алматыда 4 жастағы бүлдіршін жерасты суына лық толы шұңқырға құлап, көз жұмды, деп хабарлайды ERNUR.KZ Астана арнасына сілтеме жасап.
Адам өліміне себеп болған шұңқыр кәріз сору станциясын салу үшін қазылған. Бірақ маңайы қоршалмай беті ашық тұрған дейді, марқұмның жақындары. Олар қайғылы жағдайға құдықтың құрылысына жауапты мекемені кінәләйді.
Қайғылы оқиға Алатау ауданындағы Қарасу шағын ауданында болған. Рамазан есімді балғын түскі мезгілде есік алдына ойнауға шыққан. Ойын баласы үйінің қасындағы шұңқырға тайып жығылған. Үлкендер көмекке келгенше, тұншығып қалған көрінеді.
"Досым екеуміз көшеде кетіп бара жатқан едік. Баланың анасы айқайлап, көшеге жүгіріп шықты, біз баланы шығарып алдық. Бірақ сәл үлгермедік. Аман алып қалуға тырыссақ та, онымыздан түк шықпады", - дейді Қарасу шағын ауданының тұрғыны Савердин Мырзамов.
Қайғыдан қан жұтқан отбасы болған жайтқа әлі сене алар емес. Олар шұңқырдың бетін жаппаған жауаптыларды жазғырып отыр.
Қайғылы оқиғадан соң мамандар шұңқырды былай қоршап қойыпты. Бірақ бұл қауіп сейілді деген сөз емес дейді көпшілік.
"Мына жерде қоршау болмаған, орында сетка ғана тұрған. 5 жастағы баланы кім қарап отырады жүгіріп барып ойнаған, аяғы тайып кеткен, топырақ қой езіліп жатыр. Құлап кетті қайтыс болды, кім кінәлі. Тастаса да биіктетіп жабу керек еді", - дейді тұрғын Айнаш Салықбаева.
Қазір қайғылы оқиғаға қатысты тергеу жүріп жатыр. Сот медициналық сараптама тағайындалған. Қас бен көздің арасында баласынан айрылып қалған отбасы мердігерді сотқа бермек. Ал жауаптылар болса, қауіпсіздік талаптары сақталғанын айтып ақталуда. Кімдікі бұрыс, кімдікі дұрыс? Оны енді құзырлылар анықтайды.
