Жаңа Зеландияда Қазақстанның құрметті консулдығы ашылды

26.02.2021 09:43

2 504

Құрметті консул болып Beesley Investments Limited консалтингтік компаниясының директоры Брайан Эшли Джонсон тағайындалды.

ERNUR.KZ. Қазақстанның Сингапурдағы және Аустралия мен Жаңа Зеландиядағы қызметін қоса атқарушы елшісі Аркен Арыстанов Жаңа Зеландияның ең ірі қаласы – Оклендте Қазақстанның Құрметті консулдығының салтанатты ашылу рәсіміне онлайн режимде қатысты, деп жазады baq.kz.

Джонсон мырза көптеген жыл бойы қазақстандық-жаңа зеландиялық өзара іс-қимылды кеңейтуге жәрдемдесіп келді.

Атап айтқанда Алматы Регби клубымен ынтымақтасады, сондай-ақ Жаңа Зеландиядағы Қазақстан азаматтарына белсенді түрде жәрдем көрсетеді. Сонымен бірге ол Жаңа Зеландиядағы Бейбітшілік судьясы (Justice of the peace) болып табылады.

Кездесуге Қазақстанның Аустралиядағы бас консулы Марат Қалижанов және құрметті консулдары Эндрю Фернихоу (Мельбурн қ.) және Джейсон Стирбинскис (Перт қ.) қатысты.

Арыстанов 2021 жыл үлкен датамен - Қазақстан Тәуелсіздігінің 30 жылдығымен тұспа-тұс келгенін және Қазақстанның Жаңа Зеландия және Аустралиямен екіжақты қарым-қатынастарын ілгерілетуде белсенді жұмысты жалғастыру қажеттігін атап өтті.